Damdawi in aṭangin Pele a chhuak

Brazil legend Pele chu damdawi in aṭangin a chhuak. Albert Einstein Hospital, Sao Paulo-ah hian a ril cancer bakah a zun kawng ṭha lo enkawl a ni a, tunah chuan a dinhmun a ṭha rih tih an sawi.

Kum 81 mi Pele hi February 13 khan Albert Einstein Hospital-ah hian dah luh niin, damdawi ina a awm aṭanga ni riat hnuah a zun kawnga natna hi hmuh chhuah belh a ni a, hei vang hian a chhuah har phah.

Damdawi in chuan thuchhuah siamin, "Pele dinhmun a ṭha, a natna erawh enkawl chhunzawm rih a ni dawn. A bik takin 2021 September thla a hmuh chhuah a rila bawk awm hi enkawl chhunzawm a ngai dawn," an ti.

World Cup vawi thum champion tawh Pele hi a kum a tam ve tawh a, a upat hnuah natna hrang hrangin a tlak buak nasa ve ta hle. Pele hian an ram Brazil tan match 92 a khelh aṭangin goal 77 a khung a, ani aia khung hnem an awm lo.