Buffon a la inkhel zel dawn

Italy goalkeeper hlui Gianluigi Buffon chuan Parma-a a contract neih lai chu kum 2024 thleng atan a pawtsei a, a contract hi a hman zawh meuh chuan kum 46 mi a ni tawh dawn.

Kum 44 mi Buffon hian nikum nipui khan a larchhuahna Serie B club Parma-ah a kir a, tun season league match vawi 26 khelh tawh aṭangin vawi 23 tehmeuh a lo khel tawh a ni.

Italian keeper Buffon chuan, "Kei leh ka chhungte tan chuan ni duhawm a ni a, he khawpui leh club ṭantute pawh an lawm ngei ka beisei," tiin a sawi

Buffon hian November 1995 khan a vawi khat nan Serie A-ah Parma tan a inlan a, goalkeeper zinga ropui ber zinga mi ni thei turin hming a chher zui.

Juventus keeper hlui chuan, "Parma khawpui nen inkungkaihna nghet tak kan neih avangin ka rawn kir. President-ah rinna chu nghat lo ilang chuan min sawmna hi ka pawm lo ang. He club hian hmabak êng tak a nei a, chona hmachhawn a châkawm ta hle," tiin a sawi.

Buffon hian Serie A, Coppa Italia, Ligue 1, UEFA Cup leh World Cup thlengin a champion a, mimal lawmman ṭhahnem tak a dawng tawh bawk.