Coppa Italia ; Fiorentina-ah Vlahovic a kir dawn
Zanin dar 1:30 hian Coppa Italia semifinal first leg khel turin Juventus chu Fiorentina mualah an lenglut dawn. Thlasik bazar laia Old Lady pantu Dusan Vlahovic-a'n a club hlui a hmachhawnna hmasa a ni dawn.
Tun dinhmunah chuan squad nei chhah zawk Juventus hi hliam vangin an buai a, mualneitu Fiorentina erawhin hliam leh hrem langsar an nei lo thung - an player neih dan thlir erawh chuan Juve hi chak tura rinkai zawk an ni ang.
En bik tur Vlahovic
Dusan Vlahovic-a'n 2018 aṭangin Fiorentina jersey a ha ṭan a, a season hmasa berah Serie A match 10 khelin goal a khung miah lo. 2019-20 season-ah pawh match 30 aṭangin goal ruk chauh a khung.
Season hmasa erawh kha chuan league goal 21 a khung, kuminah pawh season chanve lekah Fiorentina tan goal 17 a khung - thlasik bazarah Juve a pan a, a club thar tan hian goal thum a khung leh tawh bawk.
Kum 22 mi Vlahovic chuan, "Fiorentina nen kan inkhelh tur hi sawi vak dan pawh ka thiam lo, ka phur rualin ka huphurh hle bawk. Hun rei tak ka khelh tawhna a ni a, chuvangin ka nunah hmun pawimawh an chang reng tawh ang.
"A pawimawh ber chu football match kan khelh tur hi a ni. Tun hnaiah fakna hrang hrang ka dawng ṭhin a, nuam pawh ka ti thei hle. Mahse, football chu mahni chauha khelh chi a ni lo, ṭhiante zara par chhuang mai ka ni," a ti.
Hliam vanga buaina
Massimiliano Allegri-a'n beisei angin Juventus hi season bul a ṭan ṭhatpui lo a, thlasik bazar a hman ṭhat avang erawh chuan tun hnaiah result an nei ṭha. An player lak thar zingah Denis Zakaria chuan hmun pawimawh a chang phak.
Switzerland international hi zaninah erawh a inlan thei dawn lo. A malpui vei lam hliam vangin chawlh kar thum chhung vel a chawlh a ngai dawn; ani a awm loh chuan Manuel Locatelli-a'n midfield lai a luahlum a ngai dawn, tlarhnung a pui bawk ang.
Zakaria bakah hian - Federico Chiesa, Weston McKennie, captain Giorgio Chiellini leh forward Paulo Dybala te chu hliam vangin an chawl mek bawk. Dybala hi chu hliam na tak a ni lem lo, zaninah a inlan thei mai thei tiin an sawi.
Argentine forward Dybala a la inkhel thei lo a nih chuan Alvaro Morata chu Vlahovic thlawp turin a la awm thei dawn bawk. A nihna takah chuan player ṭha ṭhenkhat inkhel thei lo mah se Juventus squad hi a la chhah angreng hle.
Italiano a zam lo
Fiorentina manager Vincenzo Italiano chuan, "Hlauh nei chunga inkhelh chu awmzia a awm lo, tun ṭumah pawh hian Juventus hi hlau chungin kan mikhual tur a ni lo ang, ka naute pawh zam lo turin ka fuih," tiin a sawi a, a striker hlui Vlahovic chuan ṭha taka lo dawnsawn a phu tih a sawi bawk.
Italian manager chuan sawizawmin, "Atalanta kan hneh hnu lawkah Sassuolo kan ngam lo. Match hnuhnung bera kan chak loh chhan kha red card leh hun tawp dawna goal chhuah a ni, kan tihsual ang kha a thleng nawn tawh tur a ni lo ang," a ti.
Sassuolo laka hnawhchhuah tawk midfielder Giacomo Bonaventura chu zaninah a inlan thei dawn, hrem a nihna kha Serie A atan chauh a ni. Bonaventura leh Lucas Torreira te midfield-ah an inkawp thei dawn tihna a ni.