Grizzlies tana record siamtu Ja Morant

Ja Morant chuan nimin zing khan point 52 a nei a, a club Memphis Grizzlies tan match khata point nei hnem ber record a siam. Record a siam rual hian Grizzlies chu San Antonio Spurs lakah 118-105 in hnehna a chanpui.

Spurs coach Gregg Popovich-a'n NBA regular season-a team chakpui hnemtu Don Nelson (1,335) nihrual a tumna chu a tawp rih a, a hmaah Morant a lo din avangin record nihrual tur chuan match dang a nghah leh rih a ngai dawn.

Veteran coach Popovich chuan, "Morant kha player duhawm tak a ni a, kum 22 chauh a la ni lehnghal. Mi tam takin a chanchin hi an sawi tawh a, an la sawi zel fo bawk ang. Kum naupangte la ni mah se court chhungah thutlukna siam turin a puitling tawh," tiin a fak.

Nimin zing inkhel dangah Giannis Antetokounmpo chuan a zawna a vawi nga nan double-double a nei a, Milwaukee Bucks chuan an mikhual Charlotte Hornets chu 130-106 in an hneh.

NBA Most Valuable Player (MVP) vawi hnih ni tawh hian point 26 a neih bakah rebound vawi 16 a la a, assist vawi ruk a nei bawk. New York khawpuia inkhel dangah Toronto Raptors chuan Brooklyn Nets 133-97 in an hneh ve bawk.

NBA - Nimin Results
Minnesota Timberwolves 127 - 122 Cleveland Cavaliers
Indiana Pacers 103 - 119 Orlando Magic
Chicago Bulls 99 - 112 Miami Heat
Toronto Raptors 133 - 97 Brooklyn Nets
San Antonio Spurs 105 - 118 Memphis Grizlies
Charlotte Hornets 106 - 130 Milwaukee Bucks
Sacramento Kings 131 - 110 Oklahoma City Thunder