Vladimir Putin-a black belt hlihsak

World Taekwondo Headquarters chuan thuchhuah siamin, Ukriane ram run avanga pawi sawi lo tam takin nunna an chan chu na takin a dem a. World Taekwondo hmathlir "Hnehna aiin remna leh muanna a hlu zawk" tih chu a kalh tlat a ni, a ti.

Hei vang hian November 2013-a World Taekwondo Headquarters-in Russia president Vladimir Putina hnena honorary black belt 9th dan a pek pawh a hlihsak nghal.

International Olympic Committee (IOC) thlawpin World Taekwondo buatsaih international inelna hrang hrangah Russia leh Belarus hnam hla sak leh hnam puanzar zar a khap nghal a, Russia leh Belarus ram chhungah international inelna buatsaih a khap zui bawk.

World Taekwondo hian mihring zahawmna vawnhimna kawnga hriat hlawh te, taekwondo hmasawnna atana thawh hlawk ram hruaitute hnenah honorary black belt hi a hlan ṭhin.

Chung zingah chuan US president Barack Obama leh Donald Trump te bakah Spain, Croatia Pakistan, Indonesia leh Honduras ram hruaitute pawh an lo pe tawh.

Mizoram taekwondo hmasawnna avangin kum 2012 khan kha tih laia Mizoram chief minister Lal Thanhawla pawh an lo hlan tawh bawk a ni.