Copa del Rey final khel tur hriat dawn

Spanish football-a inelna ngaihhlut hlawh tak Copa del Rey semifinal pakhat zawk second leg chu zanin dar 2:00-ah khelh a ni dawn a, Valencia khelmualah Athletic Bilbao an leng dawn - final khel tur pakhat zawk a hriat dawn e.

Bilbao khelmuala team pahnih an intawn hmasak ṭumin 1-1 in an inhnehtawk a, mahse, Copa del Rey-ah away goal rule hman a nih loh avangin khualmuala goal khungtu Valencia dinhmun a ṭhat phah bik chuang lo.

September 2019 hnuah Valencia hian Bilbao an hneh leh tawh lo a, zaninah erawh thawnthu danglam an beisei ang - team pahnih an intawn hnuhnung paliah chak zawk an awm lo tih pawh hriat telsak a ṭha a, zanin inkhel a hmuhnawm loh ring suh.

Valencia dinhmun
Mahni muala inkhel tur an nih avangin Bilbao aiin Valencia-in inrintawkna an ngah zawk ang tih a chiang a, chutihrual chuan Denis Cheryshev, Jose Gaya, Thierry Correia leh Jasper Cillessen te chu ṭum dang ang thoin hliam vangin an chhawr thei lo ang.

Valencia tan tlarhmaah tun season-a goal kua khung tawh Goncalo Guedes chu an chhuanvawr tur a ni leh dawn a, kum 25 mi Carlos Soler hian tun season match 24-a khelhah goal kua khungin assist vawi hnih a nei bawk - kum 22 mi Hugo Duro pawh ngaihthah loh a fuh ang.

December thlaa league match thum a zawna an chak hnu khan Valencia hi league match sarih zet an chak zo tawh lo a, mahse, tun season-a an match pawimawh bera chhal ngam an khelh hma chiah hian league-ah Real Mallorca chu 1-0 in an hneh a, inrintawkna nen an inlan thei dawn.

Hello Bilbao
Valencia-in semifinal kal-kawngah quarterfinal-a Cadiz an hneh chu La Liga club an tum awmchhun an ni a, Bilbao erawhin Barcelona (last 16) leh Real Madrid (quarterfinal) an hneh avangin an inringtawk khawp ang.

Chutihrual chuan an league match hnuhnung berah khan Barcelona chuan 4-0 ngawtin Bilbao hi an sawp a, match pawimawh tak khelh hmaa heti zata tlawm hian an team-ah ṭha lo takin nghawng a nei thei tih hriat a ṭha.

Bilbao hian si ban nghak turin Spain first choice keeper Unai Simon an nei a, a hmaa ding tur Inigo Martínez a la awm cheu a, goal khung turin Iker Muniain leh Iñaki Williams te an awm bawk - an ngaihtuahawm lo.

Copa del Rey Semifinal
First Leg
February 9, Nilaini Zan
Rayo Vallecano 1 - 2 Real Betis
RAY: Alvaro Garcia 5'
REB: Borja Iglesia 26'; William Carvalho 68'

February 10, Ningani Zan
Athletic Bilbao 1 - 1 Valencia
ATH: Raul Garcia 37'
VAL: Hugo Duro 65'

Second Leg
Zanin Inkhel Tur
Valencia 01:30 AM Athletic Bilbao

March 3, Ningani Zan
Real Betis 01:30 AM Rayo Vallecano
*Away goal rule hman a ni lo