Atalanta an chak chiang

Serie A aṭanga Champions League khelh tum Atalanta chuan Sampdoria 4-0 in an sawp a, palina nih phak an tumna an chhawm nung zel. An chunga awm Juventus an phak lohna chu point thum a ni a, match khatin an khel tlem zawk.

Thawhṭanni zan Serie A inkhelah Atalanta tan hian Mario Pasalic-a'n goal hmahruai a khung hnuah, midfielder Teun Koopmeiners chuan goal hnih a khung belh a, hun tawp dawnah Aleksey Miranchuk-a'n chak a nemnghet bawk a ni.

Gian Piero Gasperini naute hian attacking game hmuhnawm an khel ṭhin. Tun hnai season thum chhung chu Serie A team zinga goal khung hnem ber an ni a, season kal laiah pawh goal 50 an khung tling leh tawh.

Atalanta manager Gasperini chuan, "Goal mawi leh ṭha tak tak pali kan khung, a tir lama goal kan khung nghal khan inkhelh a tiawlsam deuh niin a lang. Mahni goal venghim chunga mamawh zat goal neih theih bawk hi chu a lawmawm zual.

"Ka naute hian sang tak thleng turin theihna an nei. Chetsual leh hnufum lai deuh te chu awm ve ṭhin bawk mah se, inpumkhatna nen khelmual chhunga kan luh a, mahni nuam tih leh thiam dan taka an khelh hi chuan result pawh a ṭha ṭhin," a ti.

Atalanta tan hian Serie A nomawi beiseina a sang tawh lo. Mahse, match khata an khelh tlemna hi an khelh hunah an chak a nih chuan Juventus an nihrual thei dawn a, palina ni phak tur chuan an dinhmun a la ṭha tawk hle thung.