Warrior Boxing Series NT-a a inhnek dawn ta

Mizo zingah mai ni lo, Indian boxing thlenga hriat hlawh NT Lalbiakkima chuan professional boxing huang chhunga a hmasa ber atan inhnek a hmachhawn dawn ta a, harsatna a awm thut a nih loh chuan December 20 khian Warrior Boxing Series qualifier-ah a inlan ang. 

NT-a chuan, "Nasa takin inbuatsaihna ka kalpui mek a, huphurhna ka nei lo," tiin inhnek châka a tuihal tawh thu Vanglaini a hrilh a, 'Zo Keite' hming lem an pek boxer a ram chhuak dawn ta. 

Warrior Boxing Series hi Marine Pro Boxing Promotions-in an buatsaih tur a ni a, Mumbai-a hmunpui nei company hian inhnek hi an hmunpui neihna khawpuiah hian an buatsaih ang. 

NT-a hian June, 2018 khan Kazakhstan-a President's Cup inelnaah India aiawhin boxing glove-a bun a, he inelnaah hian world number 1 ni lai leh Olympic gold medalist Hassanboy Dusmatov-a hneh avangin a lar hle. 

Mahse, Siaha tlangval hian a beisei angin amateur boxing-ah duhsak a hlawh tawk lo a, India aiawha fehchhuak tura a inbeiseinaah pawh amah aiin a hneh hnu te thlan an ni leh ṭhin. 

NT-a'n a rilru a siam fel a, amateur boxing leh a hna ṭha tak bansanin professional boxing luhchilh turin 'risk' a la a, VN Promotions hnuaiah contract-a ziak. 

VN Promotions ruahmannain NT-a'n contract-a ziah fel hnuah South Korea-a pan a, thla ruk zet training a zuk nei. Mahse, beisei angin thil a kal lo a, Covid-19 hri a darh zui. 

NT-a hian WBO leh WBC hnuaia Asia title 'fight' neih a beisei a, inbiakna pawh thui tak a kal ṭhin. Mahse, hri leng vang bawkin a inhnek hleithei lo a, a puanthuah telin India ramah a rawn kir zui. 

Siaha tlangvalin training a ṭhulh phah lo a, mahni in lamah theihtawpin a inpuahchah chhunzawm reng a, tunah chuan Mumbai khawpuia inhnek turin inbiakna tihfel a ni ta. 

Aizawl, Bawngkawnah NT-a'n ngawrh takin training a nei mek a, Dr. Lalmuanpuia (MF&AS) chuan Mizo tlangval hi duhsak takin a training-na atana a mamawh tur ngaihtuahsakin gym thlengin a buaipui. 

NT-a chuan, "Dr. Muanpuia min buaipuina avangin ka lawm takzet. South Korea aṭanga ka lo kir hnuah pawh training ka ṭhulh lo a, theihtawp chhuaha inbuatsaih reng ka nih avangin inhnek turin ka inpeih tawh a ni," tiin Vanglaini a hrilh. 

Siaha tlangval hian South Korea aṭanga a lo kir hnuah Covid-19 vangin quarantine ngaia hun hman chang pawh nei mah se a theih angin training a chhunzawm reng a, a thawhrimnain fak a phu hle. 

NT-a hian December 20-ah hnehna a chan chuan February-ah Warrior Boxing Series final round a hmachhawn leh ang a, March thla hnu lamah WBC emaw WBO Asia title a beisei zui thei ang. 

Marine Pro Boxing Promotions neitu Devraj Das chuan, "NT-a hi India ram puma hriat hlawh khawpa boxer langsar a ni a, a chungah beiseina kan nei sang hle. Nakkuma WBC emaw WBO Asia title fight a neih theih dan tur kan buaipui mek. 

"Singapore leh Thailand-a kan thawhpuite nen inbiakna kan nei sa tawh a, la bawhzui leh tur a ni. Kan tana pawimawh ber chu Covid-19 in ziaawm lam a pan hi a ni mai," tiin Vanglaini a hrilh a, NT-a tan hmathlir thui tak a nei. 

Covid-19 in zia lam a pan loh chuan NT-a tan Singapore emaw Thailand-a inhnek a harsa dawn a, mahse Dev-a chuan WBO emaw WBC Asia title fight chu neihtir ngei an tum thu a sawi. 

India rama professional boxing chawikang tura Marine Pro Boxing Promotions dintu Dev chuan, "December-a inelna kan buatsaih tur pawh entu an awm thei dawn lo a, February-ah hian a theih ang em, kan la sawi chiang thei lo. 

"March hnu lamah Nt-a tan WBO/WBC title fight erawh neihtir ngei kan tum a, ram pawna zin a rem ta lo a nih pawhin India-ah neih kan tum ang. Aizawl pawh kan rilruah a awm a, khawtual tlangvalin Aizawlah ngei, amah ṭantu tam tak zingah inhnek hmachhawn se a ropui dawn asin," tiin Vanglaini a hrilh a, an hmachhawp zingah Aizawl a tel.

Warrior Boxing Series-ah NT-a chauh lo pawh Mizo boxer inlan tur an awm a, Eliza Malsawmtluanga chuan heavyweight boxing-ah inhnek a hmachhawn dawn. 

Ṭhuampui tlangval Eliza hian professional boxing-ah inhnek a lo hmachhawn tawh a, October 24 khan Agra boxer Mandeep Singh chu fight-a hmachhawn hmasak berah technical knockout hmangin round thumna lekah a hneh. 

Eliza hian tun hmain amateur boxing tak ngial pawh a hmachhawn ngai lo. Mahse, fitness lam tuipui a nih avangin mahniin training a nei ṭhin a, kumin tir lam khan video an siam chu Indian boxing-a hming langsar Brijesh Yadav chuan a lo hmu fuh. 

Brijesh chuan Eliza hi boxing luhchilh turin a sawm zui a, thla hmasa khan a vawi khat nan professional fight hi a hmachhawn - Marine Pro Boxing Promotions dintu Dev-a'n Eliza che tla a hmu fuh a, Warrior Boxing Series khel turin a sawm ve leh a ni. 

Indian Boxing Council-a inziak lut Eliza chuan, "Warrior Boxing Series hmachhawn hi ka huphurh lem lo a, theihtawp chuan ka inpuahchah ve reng a ni, " tiin Vanglaini a hrilh a, "Inhnek zawh rawn haw hnua quarantine ngai hi keimah lamah chuan a ti peihawmlotu awmchhun a ni deuh mai," tiin fiamthu a thawh zui.