Elneny-a'n hri leng a kai

Arsenal midfielder Mohamed Elneny chuan Covid-19 a kai, hri leng a kai thu hi an ram Egyptian Football Association chuan an puang a, a chawlh chen tur erawh tarlan theih a la ni lo thung.

Kum 28 mi Elneny hi Egypt tan a feh chhuak a, Thawhlehni zan khan Togo nen Africa Cup of Nations qualifier khel tur an ni. Mahse inkhelh hmain hri leng a kai tih hmuhchhuah a ni, natna lang chhuak nei lo mah se khung hran a ngai.

Tun kartir khan Premier League thuneitute chuan mi 1,207 endik zinga 16 chuan hri an kai thu an lo puang tawh a, hri kaite hi ni 10 chhung khung hran tur an ni. Elneny bakah hian Egypt tana a khelhpui Mohamed Salah pawhin hri hi a lo kai tawh bawk.

Egyptian FA tarlan dan chuan an midfielder hi endikna hmasa pathumah chuan a filhim a, an match hnuhnung berah Togo an mikhual ṭum pawhin minute 90 chhung a inkhel thei a ni.

Amaherawhchu, Togo lama inkhel tura an zinnaah endikna a paltlang zo ta lo a, an ram Cairo-ah hruai kir niin endik nawn leh a ni ang. Pathianni zana Arsenal leh Leeds ten league an khelh tur bakah, Europa League lama Molde nen an inkhelh hunah a inlan theih a beiseiawm lo.

Season kal laiah Elneny hi Gunners player pawimawh zinga mi a ni, inelna hrang hrangah match 11 khel tawhina team hi EPL table-ah 11-na a nih pui mek a, Europa League lamah erawh group hmahruaitu an ni thung.

Thawhṭanni khan Republic of Ireland chuan Tottenham defender Matt Doherty leh Stoke midfielder James McClean te chuan hri an kai thu an puang tawh bawk, hri leng hian infiamna khawvel a ti buai chhunzawm rih dawn tih a hriat theih.