Djokovic leh Medvedev an chak

ATP Finals 2020 khelh laiah Novak Djokovic leh Daniil Medvedev te chuan an match hmasa berah hnehna an chang a, champion tura rinkai pahnih hi zanin dar 1:30-ah an intawng chhunzawm leh nghal ang.

Thawhṭanni zan O2 Arena, London khawpuia inkhelah Djokovic-a'n a vawi khat nana inlan Diego Schwartzman chu 6-3, 6-1 in a hneh a, hnehna chang tur hian a tir aṭanga a tawp thlengin harsatna lian tham a tawk lo.

Inkhel dangah seeded palina Daniil Medvedev chuan Alexander Zverev lakah 6-3, 6-4 in hnehna a chang ve thung. Russian tlangval hian season hmasa khan ATP Finals khel ve mah se chak ni hmel a hmu lo, tun ṭum hi a chak vawi khatna a ni.

World number 1 Djokovic-a'n a tir lamah tih fuh tawk loh a nei, set khatna game thumna an khelh laiin a service a hloh. Mahse rang taka insiamṭha zui nghalin a khingpui service a chhuhsak let a, harstana dang a tawk zui lo.

Serbian star hian a vawi ruk nan ATP Finals nomawi chawi a tum a, a hlawhtling thei a nih chuan record nei ṭha ber Roger Federer (6 titles) a nih rual chiah dawn - chutih rualin 2015 hnu lamah a la champion leh loh avangin chesual thei a ni tih a chiang.

Grand Slam vawi 17 champion tawh Djokovic hian hnehna a chan hnuah, a hmunah inkhel entu awm lo mah se court sira fans ṭhutna lam chu chibai a buk kual. Novak chuan, "Ka chak changa ka lawm ṭhin dan a ni," tiin intih maksak tum vang a nih loh thu a sawi.

Chak lo Schwartzman tan erawh thil thar vek a la ni. Argentine tlangval hian season duhawm a hmang, a vawi khat nan French Open semifinal a lut. A thiam zual pariat inelnaah a inlan vawi khatna a ni a, a match lehpek atan zanin dar 7:30-ah Zverev nen an inkhel ang.

Hard court hi Medvedev inkhelh thiamna hmun a ni a, mahse chetsual chang a ngah. Tun hnaiah erawh Russian star hi a che fuh thei hle thung, Paris Masters nomawi chawi tura a hneh Zverev chu ATP Finals lamah pawh a hneh nawn.

Kum 24 mi Medvedev chuan, "Inrintawkna hi ka tan chuan thahrui pawimawh ber a ni. Kan intawn hnuhnunga ka chak vang chauh kha a ni lo, Masters title ka lak khan inrintawkna min pek belh nasa hle a ni," a ti. Zanina Djokovic nen an intawn leh hunah pawh a tawh a khirh ang.

ATP Finals 2018 champion Zverev erawhin insiamṭhatna tur a ngah. Tleirawl mai a nih lai aṭanga a tlak chham 'dawhtheihna' a mamawh, a elpui leh hneh theih tura ngaih laka a chet sual fo chhan nia lang chu a dawh thei lo a, point khat hlutna a hriat chian a ngai.

Kum 23 mi Zverev chuan, "Ni danga ka service ṭha ang kha ka nei phak lo, khel chhe hran lo mah ila player ṭha hneh nan chuan a tawk zo lo a ni. Daniil khan chak a phu zawk, match hmasa berah chak lo mah ila semifinal luh ngei ka tum ang," tiin a sawi.