Chhinga Veng an chak lo ve ta nge nge!
Mc Dowell's No. 1 Soda Mizoram Premier League Season 7-ah Chhinga Vengin Lalsangzuala Hmar hnuaia match 50 an khelhnaah chiah Thawhlehni zan khan Mizoram Police an hneh lo a, tun season-a an vawi khat an chak lohna a ni.
Police-in B. Zoramthanga hmangin hma an hruai a, champion lai Chhingcows-in MS Dawngliana hmangin sut mah se minute 79-naah Lalbiakhlua'n Police chakna goal a khung. Zanin dar 7:00 hian Police-in Ramhlun North an hmachhawn chhunzawm dawn a, point thum an hlawh chhuak leh thei a nih chuan semifinal an hnaih sawt ang.
Chhingcows vanduai
Chhinga Veng hian tun season-ah hneh loh tawng loin MFA Super Cup leh I Day Football an champion tawh a, tun ṭuma Police an hneh loh hmaa an chak loh hnuhnun ber chu nikum October 26-a Aizawl FC an hneh loh kha a ni a, kum khat leh ni thumnaah hneh loh an tawng leh chauh a ni.
Police nena an inkhelh ṭum hian Chhinga Vengin goal chhuah hmasa mah se first half-ah inkhel an thunun zawk a, goal chance pawh an ngah. Dawngtea hmanga siphurh an sut hnuah Bawngkawn tlangval goal khung chu referee-in a pawm sak lo a, Dawngtea bawk hian second half-ah keeper F. Lalmuanawma chiah a hmachhawn hnuah a hlah bawk.
Lalsangzuala Hmar chuan, "Record ṭha neih kan duh rualin a pawimawh zawk chu nomawi a ni a, tuna kan chak loh hi insiamṭhatna hun ṭha tak a ni thei ang. Police nen pawh hian chak tumin kan khel a, kan vanduai a, referee thutlukna tihsual kan tuar bawk," tiin Vanglaini a hrilh.
Chhinga Veng tana Sanga record hi a ropui hle, season hnih chhungin vawi 50 khelhah vawi hnih chiah an chak lo a, vawi ruk inhnehtawkin vawi 42 zet an chak. MPL7-ah pawh Chhingcows hian match 10 khelh aṭangin point 23 an hmu a, semifinal an khelh ngei a rinawm tawh bawk.
Police kim an ṭha
Mizoram Police hi an kim chuan an ṭha a, champion rinkai an ni a, an kim lo erawh chuan team vantlang an ni. Chhingcows an hmachhawn ṭum hian an kim a, season liam ta best midfielder R. Malsawmtluanga freekick pet chu B. Sena'n minute rukna lekah a tauh lut. Chakna goal khung tura inrawlh te pawh an hraw hle, MPL4 best player F. Lalrinpuia ball pet chu MPL2 leh MPL3 top scorer Biaktea'n chakna goal khung nan an hmang a, he goal luh theih nan hian MPL5 best player Malsawmfela a ṭangkai hle.
Police coach Lalbiaksanga Colney chuan, "Ka naute khelh danah ka lungawi a. Ramhlun North nen pawh hian kan theihna zawng zawng nena kan khelh a ṭul a, chak chiang sa a awm lo," tiin Vanglaini a hrilh.
Khawbung tlangval
Police keeper F. Lalmuanawma sawi hmaih theih a ni lo, Khawbung tlangval hian a starting eleven a chan hnuhnun vawi thumah match of the match lawmman a dawng vek a, a team a chak pui vek bawk.
Amaherawhchu keeper Muanawma langsar ṭhin hian Police ṭhat tawk lohna a lantir a, chuvangin zanina Ramhlun North an hmachhawn turah hi chuan an goalkeeper lansarh loh dan an zawng tawh ang.