BVT-in Electric Veng thinphu tirang

Mc Dowell's No.1 Soda Mizoram Premier League Season 7-ah Bethlehem Vengthlang FC-in Electric Veng FC 2-0 a hnehin tun season-a a vawi khat nan chak hmel an hmu a, MPL vawi khat khelhna EFC chu semifinal khel lo thei dinhmunah an din tir bawk.

Nimin tlai inkhelah hian BVT tan C. Lalrintluanga'n minute 28-naah khungin second half minute 69-naah Lalmuanzova'n an goal hnihna a khung leh bawk. EFC hian match 10 khelhah point 17 hmu tawh mah se an hnuaia awm Mizoram Police (15 pts) bakah nizana inkhel Chawnpui FC leh Chanmari FC tan match li khelh hmabakah lehpelh theih an ni.

BVT coach a sawi dik?

Bethlehem Vengthlang FC coach leh player nikawp H. Lalhlimpuia chuan inkhelh hmain Electric Veng vanneih thu a sawi a, a thusawi dikna nemnghet turin nimin tlai khan an hneh zui bawk.

BVT hian Electric Veng an hmachhawn hma match kua an khelhah chak hmel an hmu lo a, point hnih chiah an hlawhchhuah avangin table mawnghphahah an awm a. Hlima hote hi an result

ṭhat loh avangin an hnual lo a, chak tumin Electric Veng an hmachhawn a, an hlawhtling.

Electric Vengin ball chang tam mah se goal hmaah BVT an hlauhawm zawk a, C. Tluanga'n goal ban a tih per a, hemi hnu hian BVT rawlthar hian a hun ṭha neih a hlah nawn lo. Goal khung tur hian C. Tluanga hian a vawi khat tauhnaah tauh fuh lo mah se EFC defender-in a tauh ṭhelh a, heta ball sawt kang chu hmang ṭangkaiin sir tak aṭangin a volley goal.

Second half-ah inkhel kalhmang a danglam lo a, Muanzova'n EFC keeper Vannunmawia pet khumin BVT goal hnihna a khung. Bethlehem VT tlarhnung an khawng ṭha a, Jonathan H. Lalhriatkima chu man of the match a thlan a ni.

Ṭum dang pha lo

Team pahnih inhmachhawn hmain Electric Veng leh BVT inthlauhna chu point 15 zet a ni a, khelmualah point a an inthlauhna hi EFC-in an lantir thei lo. Coach Vanlalsawma Colney chuan, "Kan naute kan fuih uluk a, mahse an rilru kan hmin zo lo niin ka hria. Kan khelh chhiat ber ṭum a ni a, kan zuam sual a ni," tiin ṭum dang an phak loh thu a sawi.

Electric Veng hian hnehna an chan zawh loh avangin an match khelh hmabak a harsa sawt dawn a; an la hmachhawn tur Chanmari FC, Aizawl FC, Chawnpui leh Mizoram Police te chu semifinal beiseina la nei vek an ni.