Champion lai City inlan hun a thleng

League Cup champion Manchester City chu zanin dar 1:15 hian an nomawi humhim an tumna kawngah an inlan dawn a, Carabao Cup last 16-ah Fulham an mikhual ang.

City hian season hmasa khan League Cup leh Premier League-ah nomawi an chawi a, an boss Pep Guardiola-a'n quadruple chawi a tum a sawi chu an hlawhtlin tir thei lo.

Tun season-ah erawh no­mawi pali chawi leh ngei an tum dawn a, 'League Cup mai mai' tiin an khel lo ang tih a chiang - Fulham an mikhual tur hi a hmuhnawm dawn.

Nizan zanlaiah Chelsea, Arsenal leh Tottenham Hotspur te an inlan a, he thu buatsaih a nih lai hian result kan hre hman lo.

Team in ang lo

Premier League match sawm khelh tawhah City an la tlawm miah lo a, hmahruaitu an ni mek - goal 27 khung tawhin goal thum chiah an la chhuah!

Fulham erawh Premier League-ah 18-na an ni a, match 10 an khelh tawhah vawi khat chiah an la chak a, goal 11 chiah an la khung laiin an lamah goal 27 a lut thung.

Tlarhnung phui lo Fulham hmaah goal khung thiam City an inlan dawn a, goal a lut tam a nih pawhin a mak lo ang. Hriat tel atana ṭha erawh Fulham hian ram leh club tana a match hnuhnung 20-a goal 13 khung thei Aleksandar Mitrovic an nei ve tho tih hi a ni a, City tan fim­­khur a ngai ang.

Inlan tur

Manchester City tan Ilkay Gundogan chu Champions League-a Hoffenheim an hneh ṭuma a inhliam avangin a inlan theih a rinawm loh a, Danilo dinhmun a la chiang lo bawk.

City goalkeeper Claudio Bravo chu rei tak hliam vangin a inlan tawh lo a, third round-a Oxford United an hneh ṭuma si ban nghaktu kum 19 mi Arijanet Muric bawkin goal a ven a rinawm tihna a ni.

Fulham lamah defender Joe Bryan chu hliam vangin a inlan theih a rinawm lo a, Kevin McDonald chu hrem vangin a inlan thei dawn lo a, player dangah erawh buaina a awm lo.

Rawlthar rual

Pep Guardiola-a'n rawl­thar leh tawnhriat ngah chawh­pawlhin squad a siksawi ṭhin a, zaninah English rawlthar beiseiawm ber pawl Phil Foden thiamna kan hmuh leh a rinawm.

Kum 18 mi midfielder hi Oxford an hneh ṭumin goal zawng zawngah a inrawlh vek a, ani bakah hian kum 19 mi Brahim Diaz leh kum 21 mi Oleksander Zinchenko te pawh inlan tura beisei an ni.

David Silva hona hnuaiah first team lama tawnhriat nei tam Gabriel Jesus leh Leroy Sane te an inlan a rinawm bawk.