England - an thawm chiah a ring

Football ram ropui an sawi apianga sawi hmaih thiang lo England chu ṭum dang ang bawkin boruakah an thamral a, Nations League-ah finals an thleng pha lo.

Three Lions hian Belgium 2-0 a an hneh loh avangin pakhatna dinhmun an luah thei lo. Zanin dar 1:15 hian Gareth Southgate-a hote hian an group-a point la hmu lo awmchhun Iceland an mikhual dawn. 

League A group 2 aṭangin Iceland an relegate tawh a, Belgium leh Denmark ten pakhatna dinhmun an inchuh dawn. Nations League aṭanga teh chuan England leh Iceland inkhel hian awmzia a nei tawh lo a, amaherawhchu football tehna dang aṭanga thlir chuan awmzia a la awm.

Gareth Southgate-a tan player enchhinna hun ṭha a ni a, England-in player chhuak thar ṭhahnem tak an neih avangin Iceland nena an inkhel tur hi Euro 2020 atana player zawnna pakhat a ni thei ang.

England-in tun hma aṭangin thawm an nei ring a, tun thlengin a la danglam lo. Southgate hnuaiah nomawi an beisei a, amaherawhchu match pawimawhah result ṭha an hlawhchhuah loh avangin England manager ban duh pawl an awm leh tawh. 

Kum 50 mi Southgate tan England manager hna chelh chhunzawm zel turin Iceland lakah result ṭha neih a pawimawh a, hnehna an chang lo a nih chuan pressure in mung chho mek hi buaipui tham a tling ang.

English football thlir ṭhin chuan Mido hi an hre ngei ang. Egypt forward hlui Mido hian Middlesbrough tana a khelh laiin Southgate hnuaiah hian a lo khel tawh a, England-in Belgium an hneh loh tak avangin nasa takin a pu hlui hi a sawisel.

Mido chuan, "England hian manager pangngai deuh an mamawh. Southgate hi an ban vat a nih loh chuan hun an khawhral mai a ni. Media hmaah a ṭawng sual ngai lo a, hemi a nih avang hian hun rei tak chhung manager a nih theih phah," tiin a sawi.

Three Lions hian Southgate hnuaiah match 48 an khel a, match 10 an chak lo. Sven-Goran Eriksson-a'n England-a enkawl lai khan match 67 a kaihruai a, match 10 tho a chak loh pui. English manager leh Swedish manager sulhnu thlir hian Mido thu sawi hian awmzia a nei tih a lang.

Mido hian a la duhtawk mai lo, Middlesbrough forward hlui chuan, "Boro-a min enkawl lai khan relegate thei dinhmunah kan ding a, thih tluk zetin a hlauthawng. A hna hmasa ber a nih avangin a hriatthiamawm rualin hetiang ang mizia hi chu a danglam tak tak ngai chuang lo. Manager ber a dawihzep chuan player-in an hre vat a, inkhelah a lang chhuak ṭhin.

"England hi ṭha taka khelh an duh a  nih chuan manager huaisen an lak a ngai a, nuam ti takin player-ten an khel thei ang. Southgate hi chu ka sawi ang manager a ni lo a, FA tana ka thurawn chu Jose Mourinho la rawh se, tih hi a ni," tiin a ṭawng huai hle.

England-in Iceland lakah hian player pawimawh Jordan Henderson leh Raheem Sterling te inhliam vangin an chhawr thei dawn lo. Liverpool captain Henderson hi inhliam vangin Belgium lakah halftime-ah thlak a ni a, Manchester City forward Sterling hi chawn hliam vangin a inlan lo thung.

Player pahnih hi club lamah an inenkawl zui dawn. Three Lions-in Belgium an hneh loh zawha an fak zui erawh Jack Grealish a ni a, Aston Villa captain hi Premier League-a a chet ṭhat bakah ram tan pawh a khel ṭha chho hle.

Zanin hian Grealish bakah player naupang rual Jadon Sancho, Jude Bellingham, Bukayo Saka, Phil Foden, Dominic Calvert-Lewin leh Mason Mount te tan manager Southgate-a tih lawmna hun ṭha a ni thei ang.