Spurs tan Dele Alli a rinawm

Dele Alli chuan Totten­ham Hotspur tana a rinawm zia lantir nan kum nga daih contract a ziak thar, England interantional midfielder hian 2024 thleng Spurs tan a khel thei dawn tihna a ni.

Kum 22 mi Alli hian 2015 khan MK Dons aṭangin Tottenham hi pound mak­taduai nga chauhin a pan, London club tan hian inelna hrang hrangah match 153 khelin goal 48 a khung sak. A hun hmasa lamah nungchang mawi lo vangin buaina nei zeuh zeuh mah se, manager Mauricio Po­chettino kaihhruaina hnuai­ah khelmual chhungah a puitling tawh hle.

Tun season chhungin Premier League match ruk khel tawhin, a hliam a dam a nih chuan rinrawl a ni chhunzawm leh ang. An match hnuhnung bera Manchester City nen an inkhelh ṭumin bench aṭanga luhtir a ni tawh.

England international midfielder Alli-a'n a hlawh tur zat hi chiang taka sawi ni lo mah se kar khatah £100,000 a hlawh tura tarlan a ni a, a hlawh hmasa let khat thawka tam a ni ang - incentive leh bonus a dawn theih nen chuan kar khata a hlawh tur zat hi £150,000 vel a tling ang.

Instagram kaltlangin Alli chuan contract thar ziah vanga a lawm thu a tarlang, "Spurs tana ka hun hman tawh ho hi nuam ka ti hle a, kan hma hunah eng nge kan tawn zel dawn tih hi ka hre chak a ni," tiin a sawi.

Tottenham hian White Hart Lane an sak ṭhat mek avang­in player lei nan sum an hmang hleithei lo, amaherawhchu tun hnaiah an player duhlai Harry Kane, Harry Winks, Son Heung-min leh Erik Lamela te chu hun rei zawk cham turin contract an ziahpui tawh a ni.