Hnehna nena bul ṭan Novak Djokovic

Novak Djokovic chuan Thawhlehni zan khan Paris Masters khelh laia a match hmasa ber a khel a, Serbian tlangval hian harsatna tawk loin Joao Sousa chu 7-5, 6-1 in a hneh nghal. Kum 31 mi Djokovic hian a match lehpek atan zanin hian Bosnian tlangval Damir Dzumhur a hmachhawn leh ang.

World number 2 Djoko­vic hian set hnuhnung zawkah 5-1 in hma a hruai laiin a service zui a, entu zinga pakhat chu dam lohna vanga enkawl ngai a nih tih a hriat hnuah towel pe leh phawtin, chumi hnuah match point vawi thum a hmuhna hmang ṭangkaiin ace a siam zui a ni.

US Open champion Djo­kovic hi tun hnaia tourna­ment a khelh hnuhnung panga zinga paliah a cham­pion thei a, heng zingah hian Wimbledon leh Sang­hai Masters pawh a tel; tun inelna bikah hian a champion thei a nih chuan Rafael Nadal khumin world number 1 a ni thei dawn.

World number 1 Nadal leh number 3 Roger Federer te chuan Nilaini zan khan an match hmasa ber an khel a, Spanish tlangval hian a hnam pui Fernando Verdasco a hmachhawn a, Federer leh Milos Raonic te an inkhel bawk - he thu buatsaih lai hian result kan hre hman lo.