Suarez-a'n Barcelona hmachhawn thei dawn lo

Barcelona striker hlui Luis Suarez chuan Covid-19 a kai a, Atletico Madrid striker hian Inrinni zan dar 1:30-a Catalan club an mikhual hunah a club hlui a hmachhawn thei dawn lo tihna a ni. 

Uruguayan Football Association (AUF) chuan an striker chhuanvawrin Covid-19 a kai thu hi an puang a, tukin zing dar 4:30-a Brazil nena World Cup qualifier an khelhah pawh a inlan lo.

Goalkeeper Rodrigo Munoz leh backroom staff member Matias Faral chu Uruguay squad-a coronavirus kai dang an ni a, AUF chuan Covid-19 kai pathum dinhmun a ṭhat thu sawiin dan anga engkim kalpui nghal a nih thu an sawi. 

Barcelona-in ma-mawh tawh lo niin inngai mah se Suarez hian Nou Camp-a chhuahsan hnuah pawh a theihna a la pholan chhunzawm zel a, tun season inelna hrang hrangah match kua khela goal nga khungin assist vawi khat a nei. 

Atletico Madrid tan chuan Barcelona laka Suarez chhawr theih loh hi channa a ni dawn a, Catalan club tan an club hrechiangtu inkhel thei lo tur hi chanchin lawmawm a tling thung ang. 

Kum 33 mi striker hian an ram jersey nen pawh goal a khung chhunzawm reng a, Brazil an hmachhawn hmaa 3-0 a Colombia an hnehna inkhelah pawh penalty aṭangin goal khat a khung a ni. 

Atletico Madrid boss Diego Simeone chuan Suarez an neih tak avangin player dang pawhin an khelh ṭhat phahah a ngai hial a, tlarhmaa Suarez-a kawppui deuh ber Joao Felix chuan tun season-ah match 10 khela goal sarih khungin assist vawi thum a nei tawh. 

Argentine coach Simeone chuan, "Luis Suarez-a awm tak avangin player dang pawhin an khel ṭha a ni," tiin a sawi a, Uruguayan striker tel loa Atletico-in Barcelona an hmachhawn dan tur hi hmuh a châkawm ta hle.