Kum hnih atan Manangoi an hrem

Elijah Manangoi chu damdawi hman phal loh a hman leh hman loh endikna vawi thum a inlan loh avangin an hrem, mipa 1500m intlansiaka world champion ni tawh hi kum hnih chhung inelna hmachhawn thei lo tura tih a ni.

Kum 27 mi Manangoi hian 2015 Beijing World Championship-ah khan silver medal a dawng a, 2017 World Championship an neih leh meuh chuan London khawpuiah amah umphaktu an awm lo.

Infiammite hi damdawi hman phal loh lakah an fihlim em, tih chu a khat tawkin endik an ni fo a, tun hnai thla 12 chhungin Kenya tlangval hian endikna a hmachhawn tur vawi thumah a inlan lo vek.

Athletics Integrity Unit chuan hrem a nihna hi December 22, 2019 aṭanga chhiar ṭan a nih thu an sawi a, kuminah inelna hmachhawn tur a neih mumal loh avangin a vannei. Infiammite nghahhlelh Tokyo Olympic 2020 erawh a hmachhawn ve thei dawn lo tihna a ni.