Inkhel pawimawh Chanmari leh Electric

MPL season hnihna aṭangin knockout stage a awm ṭan a, Chanmari FC-in league round an paltlang ziah. Tun season-ah erawh Chanmari hi dinhmun derthawng takah an ding a, vawiin tlai dar 3:00-a Electric Veng FC nen an inkhel tur hian an hmalam hun a hril ang.

Chanmari coach Chawngthansanga chuan, "Vanduai a hun tawh loh chungin kan vanduai miau si. Tunah chuan semifinal sawi thei kan ni rih lo a, kan khelh hmabak chak hi a pawimawh. Electric Veng hneh hi kan tum hmasak ber tur chu a ni," tiin Vanglaini a hrilh.

Chawnga hian phase 2 aṭangin Chanmari a enkawl ṭan a, a enkawlna hnuaiah chak hmel an hmuh loh avangin semifinal an hlat hret hret a, tunah chuan chetsual a thiang tawh lo. MPL-ah hian head to head en a ni a, away goal rule en tel a ni bawk. Chanmari leh Electric Veng hi tun dinhmunah point rukin an inthlau mek.

EFC hian Chanmari hi an intawn hmasak ṭumin 3-1 in an hneh a, he inkhel hi Electric Veng home a nih avangin Chanmari 'away goal khat' an nei tihna a ni. Chawnga hote hian EFC aia point inanga dinhmun ṭha zawk turin 2-0 tala an chak a ngai ang.

Chanmari FC khelh hmabakah hian Electric Veng bakah Ramhlun North, Bethlehem VT leh Aizawl FC te an awm a, zanina an hmachhawn tur hi an hneh a nih chuan an hnuaia awm pahnih an la khelhpui dawn avangin semifinal khel thei dinhmunah an la ding. Chutihrualin tun dinhmuna pathumnaa awm mek Electric Veng hian point 17 an hmuh tawh avangin an dinhmun a ṭha zawk a, point khat chauh pawh hmu se hnualna tur a awm dawn lo.

Chutihrualin Electric Veng hian an khingpui tur Chanmari ang thoin phase 2-ah chak hmel an la hmu lo a, hlauthawng pahnih inkhel hi a hmuhnawm ang.