Australian Open chiang lo zel

Tennis season tir lama khelh ṭhin Australian Open 2021 chu a dinhmun a chiang lo chhunzawm zel a, mipa singles champion lai Novak Djokovic chuan inelna hi harsatna karah pawh neih theih hram a duh.

Inelna thleng tur Tennis Australia (TA) chuan tournament buatsaih ngei an duh a, inbuatsaihna tounament tenau pawh siam an tum. Mahse, Melbourne khawpuiah Covid-19 kai an awm belh zel a, thuneitu lamin inelna buatsaih turin phalna an la pe thei lo.

Australian Open hi nakkum January 18-31 chhunga khelh tur niin, a hmuna entu a awm theih beiseina pawh a sang lo. Inelna neih hun sawn pawh a ngai hial mai thei a ni.

Tournament director Craig Tiley chuan, "Inkhel tur leh inelna neih tura inhnamhnawih zawng zawngte himna tur ngaihtuah a ngai, keini chuan 'risk' lak chu kan tum lo," tiin sorkar lamin a remtih puina thlap a nih loh chuan nawr luih an tum lo.

Serbian tlangval Djokovic chuan, "Austra-lian Open khelh ngei ka duh, inelna neih ṭan hmain thla hnih leh a chanve vela rei a la awm a, thil tam tak a la thleng hman dawn tih chu a chiang.

"Beiseina nen kan thlir phawt a, hri leng karah pawh buatsaih theih ni se tih chu ka duhthusam a ni," a ti. Djokovic hian Australian Open nomawi hi vawi riat ngawt a chawi tawh a ni.

TA lamin ruahmanna an siam lawk dan chuan January thlatir hian Victoria-ah inelna an buatsaih ang a, player-te chu hmun khatah dah khawmin an kal darh lo ang a, tennis court hrang hrangah erawh an kal thei thung ang. Khung hran tawh sa hian Australian Open an khel zui ang tih chu an beisei dan a ni mek.