Rafael Nadal a inhnukdawk Number 1 thar tur Djokovic

Mipa tennis world number 1 Rafael Nadal chu pum na vangin Paris Masters aṭangin a inhnukdawk a, inelna a hmachhawn loh avang hian ranking point a hmuh belh dawn lo. Kar leha ATP ranking a chhuah thar hunah chuan Novak Djokovic chu a chung berah a awm ang.

Kum 32 mi Nadal chuan, "Hma ka sawn viau a, inkhelh theih ngei pawh ka inring hle. Mahse, practice neih laiin ka pumah harsatna a awm a, a bik takin sercive zawngin min ti buai. Doctor ka rawn hnuah ka tan inkhelh rih loh a ṭhat zawk thu min hrilh a ni," tiin a sawi.

Spanish tlangval hian ATP Finals a khelh theih dawn leh dawn loh a la sawi chiang lo a, a thiam pariat inelnaah hian inlan se a champion zui thei a nih chuan world number 1 ni chunga season khar theihna hun ṭha a la nei. Chutihrualin number 1 ni thar tur Djokovic pawhin a chung bera awm chungin hun tawp hman a tum ngei ang.

Serbian tlangval hian tun hmain world number 1 nihna a lo chelh reng tawh ṭhin. Mahse, 2016 November thla khan Amdy Murray lakah a dinhmun a chan a, hemi hnuah tun ṭum hi a sang bera a awm lehna hmasa ber tur a ni - Djokovic hian Paris Master-ah hian a match hmasa berah hnehna a chang tawh a ni.

World number 21 ni chunga season bul ṭantu Djokovic tan a thlen chin hi a ropui a, chutih rualin Grand Slam pali zinga pahnih - Wimbledon leh US Open nomawi a chawi theih avangin season hmang hlawhtling ber tiin a chhal ngam.

Nilaini zan khan Roger Federer pawh inlan tur a ni. Amaherawhchu, Federer-a khingpui tur Milos Raonic chu kiu hliam vangin a inhnukdawk a, world number 3 hian khelh hah ngai loin last 16 a luh theih phah.