Solari hnuaiah Real tan harhtharna?

Real Madrid chuan Julen Lopetegui an ban hnua an match hmasa berah hnehna an chang nghal a, Copa del Rey last 32 first leg-ah UD Melilla chu 4-0 in an sawp - Karim Ben­zema, Marco Asensio, Alvaro Odriozola leh Cristo Gonzalez ten goal khat ṭheuh an khung.

Real Madrid hi coach lai­lawk Santiago Solari hnuaia khel an ni a, an hmachhawn team hi third division club an nih avangin phur hluaina tur erawh a la ni lo - a pawimawh ber erawh goal li ngawt an khung ta hi a ni.

Hetihlai hian La Liga hma­­hruaitu Barcelona chuan khual­muala hnehna chang turin minute 90 piahlam thleng an nghah a ngai a, hun pek belha Clement Lenglet goal hmangin Cultural Leo­nesa chu 1-0 in an hneh hram.

Muhil harh hun!

Real Madrid hian Lopetegui enkawlna hnuaiah duhawm lo takin season bul an ṭan a, tun season-ah league point 30 hlawhchhuah theih aṭangin point 14 chiah an la hlawh chhuak.

La Liga-a an match hnu­hnung panga aṭangin point khat chiah an hlawh chhuak a, match 14 chauh a enkawl hman tihin coach Lopetegui chu ban a ni. Season dang ang chu ni se UD Melilla hneh hi in fak hluaina tur a ni lo.

Mahse, Real hian club tenau nia ngaih Alaves leh Levante te meuh pawh an hneh lo a, Cham­pions League-ah ni se CSKA Moscow an ngam lo a, Vik­to­ria Plzen lah 2-1 in an hneh hram.

Tunah erawh...

Real thuneituten 5-1 a Bar­celona an ngam loh meuh chuan Julen chungah zah­ngaihna an lantir reng thei lo a, kawngkhar hawn sakin Santiago Bernabeu chhuahsanna lam kawng an kawh hmuh.

Madrid khaw club hian an match hnuhnung pasarihah goal li chiah an khung a, an lama lut zat erawh goal 13 a ni - Nilaini zanah erawh goal li ngawt an khung a, an lamah goal lut a awm lo.

Real ṭantute tana chanchin lawmawm dang chu Keylor Navas, Sergio Ramos, Asensio leh Benzema tih loh chu first team regular an awm lo a, Ramos leh Benzema hi second half-ah lakchhuah niin heti­chung hian an khel ṭha hle.

Solari hmabak

Real-in La Liga bikah 2008-09 chhung khan match nga chhung a zawnin an chak tawh lo a, Juande Ramos enkawlna hnuaiah an khel. Solari hoin Copa del Rey lamah bul an ṭan ṭha a, a hmabakah enge awm tih chu zawhna a ni.

Kum 52 mi manager ho hian Inrinni zanah La Ligha parukna Real Valladolid an mikhual ang a, Champions League-ah Viktoria Plzen an lenchilh ang a, Celta Vigo an lenchilh zui ang - hming chher theihna remchang vek a ni a, Solari tan Zinedine Zidane anga manager 'nghet' nihna remchang a ni.

Spanish football danah manager lailawk tan kar hnih chhung bak team enkawl theih a ni lo a, manager nghet atana lakluh an nih dawn chuan ni 15 hnu an nghah a ngai - Solari hma hun chu Real result-ah a innghat zel ang.

Barca chakna Lenglet

Cultural Leonesa khelmuala lenglut turin Barcelona-in an first team regular rual an hruai lo a, Luis Suarez leh Philippe Coutinho te ho chu squad-ah pawh hmuh tur an awm lo.

Barca coach Ernesto Val­verde-a'n thutlukna a siam sual dawn niin a lang hman a, third division club khelmualah Catalan club-in hnehna an chang zo dawn lo niin a lang.

Mahse, hun pek belhah Barca tan bench aṭanga luhtir Lenglet a inlar a, Ousmane Dembele freekick aṭanga ball kal chu Barca tana a goal hmasa ber ni turin a khung - second leg hi Nou Camp lama khelh leh tur a nih avangin Barca tan hna a awlsam tawh ang.

Copa del Rey last 32
Inkhel Result
Melilla 0 - 4 Real Madrid
Córdoba 1 - 2 Getafe
Deportivo Alavés 2 - 2 Girona
Mallorca 1 - 2 Real Valladolid
Cultural Leonesa 0 - 1 Barcelona
Ebro 1 - 2 Valencia
Lugo 1 - 1 Levante
Leganés 2 - 2 Rayo Vallecano
Sant Andreu 0 - 1 Atlético Madrid