Lampard 'haw' zanah lawm a kim lo
Chelsea fan-ten Nilaini zan khan an legend 'Frank Lampard' an mikhual a, English midfielder hlui hian a ropuina hmun hi hlim tak erawhin a chhuahsan thei lo.
League Cup last 16-ah Chelsea hian Lampard-a team enkawl Derby County an mikhual a, Stamford Bridge-a Lampard lawmna authawm ri ring tak karah Blues hian 3-2 in hnehna an chang.
Derby defender pahnih Fikayo Tomori leh Richard Keogh te chuan an lamah an ti lut ve ve a, Championship club tan Jack Marriott leh Martyn Waghorn ten an si phurh hi vawi hnih ngawt an sut.
Mahse, Chelsea midfielder Cesc Fabregas chuan minute 41-naah an goal thumna a khung a, Derby lamin a chhanletna tur an neih tawh loh avangin 3-2 in Blues an chak a, quarterfinal-ah Bournemouth an hmachhawn ang.
Inkhel chu
Stamford Bridge-ah inkhel
ṭan hmain Leicester City neitupa helicopter chesuala nunna chan te hriatrengna hun hman a ni a, Foxes leh Chelsea boss hlui Claudio Ranieri chuan a hmunah inkhel a en bawk.
Goal hmasa ber lut turin nghah rei a ngai lo. Minute ngana lekah Chelsea aṭanga loan-a Derby pantu Fikayo Tomori chuan an lamah a ti lut a, Jack Marriott chuan minute li hnu lekah ṭha zetin a sut zui.
Derby-in own goal hmang bawkin an chhuah nawn a, defender Keogh chuan an lamah a ti lut - Derby own goal pahnih hi Davide Zappacosta cross ball aṭanga lut ve ve a ni!
Championship club hian Martyn Waghorn hmangin chhanglet leh mah se Fabregas erawh an chhanglet thei ta lo - Stamford Bridge-ah hian Derby tana inlan zingah Tomori bakah Mason Mount chu Chelsea player loan-a khel chhuak an ni a, an khel chhe lo.
Super Frankie
Stamford Bridge-ah Chelsea fan-ten an legend an lo lawm a, banner lian tak tak Lampard lawm nan an lo tar a, a hming lamin an lo zai bawk - Chelsea tana match 648 khela goal 211 khungtu a ni miau a, a phu a ni.
Blues tana goal khung hnem ber record chelhtu hian Championship lamah Derby a chet ṭhatpui rih viau - point li chiahin hmahruaitu an phak lo a, League Cup third round-ah Manchester United an hnawt chhuak a, Chelsea hmachhawn hma hian an match hnuhnung pangaah an tlawm miah lo bawk.
Chelsea lakah pawh result duhawm an hlawh chhuak ṭep a, an beisei ang erawh a ni ta rih lo. Chelsea tana Premier League, Champions League leh FA Cup nomawi chawitu chuan, "Chelsea fan-te chungah ka lawm em em a ni.
"Ka duhthusam ang takin Chelsea kha ka chhuahsan lo a, a hunlai phei kha chuan hrehawm ka ti hle. Mahse, he team hi chu ka thinlungah a cham reng ṭhin a, zanin ang hun duhawm ka tawng thei hi ka vannei takzet a ni," a ti.
Eng nge an sawi?
Chelsea assistant manager Gianfranco Zola chuan, "Game harsa tak a ni a, Derby khan an khel ṭha hle. Keini aiin chance hlauhawm an ngah zawk a, ṭum dang aiin kan tlarhnung a phui lo bawk," tiin an khelh ṭhat loh thu a pha lo.
Derby boss Lampard chuan, "Draw result tal kan phuin ka hria a, kan result avangin ka lawm lo a ni. Annin goal thum an khung a, keinin goal li kan khung thung," tiin an own goal chungchangah fiamthu a thawh zui.
Lampard chuan, "Hetianga fiamthu ka la thawh chhan chu kan khelh ṭhat vang a ni a, ka naute khelh dan ka chhuang takzet a ni," tiin a club hlui laka an khelh danah a lawm hle.
League Cup - Last 16 Result
West Ham 1 - 3 Tottenham Hotspur
Chelsea 3 - 2 Derby County
Arsenal 2 - 1 Blackpool
Middlesbrough 1 - 0 Crystal Palace
Burton Albion 3 - 2 Nottingham Forest
Bournemouth 2 - 1 Norwich City