Giroud-a'n inkhelh tam a mamawh - Deschamps

France coach Didier Deschamps chuan a striker hman thiam Olivier Giroud chu inkhel tam turin a duh. Chelsea striker hian nakkuma Euro khelh a duh a nih chuan club thar a zawn mai pawh a ngaih hmel ta hle.

Giroud hian ram tan match 102 a khelh aṭangin goal 42 a khung tawh a, ram tana goal khung hnem lamah pahnihna a ni - a chungah hian Thierry Henry chiah a awm.

Arsenal aṭanga Chelsea a zawm hnuah Giroud-a'n match a khel tam tawk lo. Blues manager Frank Lampard-a'n tlarhma a khel tur midang a lak belh zel a, season kal laiah a club tan vawi khat chauh inkhel bul a la ṭan thei.

Deschamps chuan, "Olivier Giroud hian a dinhmun chu a hre chiang, tuna a awm ang hi chuan awm reng chi a ni lo ang. Nakkum March thla hmain kawng dang a ngaihtuah tur a ni," tiin a sawi.

Club lamah khel tam lo mah se ram tan Giroud hian duhsak a hlawh a, coach Deschamps-a'n a chungah rinna a nghat ngam. Mahse khelmualah hun a hmang tlem zel a nih chuan midang tan nek chhuah theih a ni tih a lang.

Chelsea midfielder hlui Deschamps chuan sawi zawmin, "Thurawn petu leh pe tur ka ni lo a, ka pe ngai lo. Kei chuan ka ngaihdan ka sawi mai ṭhin, hetianga hun harsa leh khirhkhan hi chu a lo paltlang fo tawh a ni.

"A nihna takah chuan tuna a awm dan hi chu a ṭha ber chu a ni lo, hmasawnna tur lai nei vek kan ni a, a hma hun chungchanga thutlukna siam tur erawh chu Giroud a ni. Kei leh ram tana a hnathawh ropui tak tak te chu ka hre reng," tiin a sawi.

Thlasik bazar hmasa khan Giroud hi chhuak tura ngaih a ni a, Tottenham, Inter Milan leh Lazio ten an ngaihven hman. Nakkum January thla bazar hunah chuan a khelh tam theihna tur hmun a zawng a nih pawhin a mak lo ang.