Wrexham neitu thar Ryan Reynolds & Rob McElhenney

Hollywood star lar pahnih  Ryan Reynolds leh Rob McElhenney-te chuan football lam hawiin an sumdawnna zauh an tum a, National League club Wrexham neitu thar an ni dawn. 

Welsh club Wrexham hian English football-a fifth division-ah inelna an hmachhawn mek a, Wrexham Supporters Trust (WST) member-te chuan Reynolds leh McElhenney-ten an club an lei remtiin 98.6% zetin Hollywood star pahnih hi an thlawp a ni. 

Wrexham hi August 2011 aṭang khan fan-te thuneihna hnuaiah a awm a, tunah erawh neitu thar langsar tak an neih avangin fan-ten an hma hun thui takin an thlir thei ang. 

Reynolds leh McElhenney-ten Wrexham-a neitu nihna an lak chhawn chungchangah WST hnuaia member 2000 chuang zetin vote an nei a, member 1,809 chuan Hollywood star pahnih hnena club neitu nihna hlanchhawn hi an remti. 

Club member 26-in a duh lo zawngin vote an thlak a, member pakuain awn lam an nei lo thung. Wrexham Supporters Trust (WST) chuan thuchhuah siam nghalin an club neitu thar pahnih hi duhsakna an hlan. 

WST chuan, "RR McReynolds Company, LLC chuan WST aṭangin club neitu nihna 100% an la chhawng dawn a, league leh FA lam aṭanga remtihna a la ngai thung. Engkim peihfel thuai a nih theih nan pawl pahnihten hma kan lak chhunzawm dawn a ni," an ti. 

Reynolds leh McElhenney hian Wrexham lei tura hma an lak lai khan Welsh club hi khawvela club langsar pawl ni phak tura din an tum thu an sawi tawh a, an beisei anga an neih theih dawn takah chuan pound maktaduai hnih vel an insen nghal a ngai ang. 

November 8 khan Reynolds leh McElhenney hian trust member hmaah virtual meeting hmangin an hmachhawpte an lo puang tawh a, November 9-ah vote thlak ṭan niin Pathianni khan vote thlak hun hi a zo a ni. 

Reynolds leh McElhenney hian an thil tum zingah club stadium thuam ṭhat leh English Football League huang chhunga kir chu a tel thu an sawi a, an hun awl neihah an club inkhel a hmuna en tura an kal ṭhin tur thu an sawi bawk.