Belgium leh Denmark ten Nations League Finals khel tur zawng dawn

UEFA Nations League-ah England-in Belgium an hneh loh avangin a zawnin finals an lut dawn lo. Three Lions-in beisei tur nei tawh lo mah se Roberto Martinez hoten finals an la lut mai lo. Zanin dar 1:15 hian King Power Stadion At Den Dreef-ah Belgium-in Denmark an mikhual dawn a, Red Devils hi an chak lo a nih chuan Scandinavian ram zawk hian finals an lut dawn.

Belgium hian Denmark hi an mualah 2-0 in an hneh tawh a, tun ṭumah hian group 2-a pakhatna dinhmun luah turin draw a tawk. 

Roberto Martinez hian midfielder ṭha mi Kevin De Bruyne leh goal khung thei striker Romelu Lukaku a kawl a, Covid-19 positive vanga Eden Hazard an chhawr thei lo chungin team ṭha tak an ni. 

Belgium hian England lakah pawh team ṭha an ni tih an lantir a, an khelh ṭhat loh ṭumah point thum an hlawh chhuak. Three Lions aiin an rilru a huaisen zawk a, FIFA ranking-a number 1 an nih miau avangin Belgium hian draw chauh ni loin chak an tum ang.

Martinez tana chanchin ṭha lo erawh England nena yellow card hmu Thomas Meunier leh Alex Witsel ten Denmark an hmachhawn thei dawn lo. 

Munier aiah hian Ligue 1 club Reims right back Thomas Foket a awm thei ang a, Witsel aiah Leicester City midfielder Dennis Praet a chhawr theih bawk ang.

Denmark hi FIFA ranking-ah 13-naah an awm a, an dinhmun thlir chuan Belgium laka hnehna chan hi a harsa dawn tih a chiang. Amaherawchu Denmark hian Euro 1992 khan khawvel barakhaihin an champion a, kum 28 liam taa thil thleng chu a rei tawh mah mah kan ti a nih pawhin England hneh theitu an ni.

Kasper Hjulmand hote hian an mualah England an chelh a, Wembley Stadium-ah Three Lions hi Christian Eriksen penalty hmangin an hneh. Danish midfielder hian Iceland 2-1 an hneh ṭumah pawh penalty aṭangin goal hnih a khung a, Nations League-ah goal li khung tawhin amah aia khung tam chu Erling Braut Haaland leh Eran Zahavi te chiah an awm.

Denmark hian keeper-ah Kasper Schmeichel an kawl a, defence pathum captain Simon Kjaer, Andreas Christensen leh Jannik Vestergaard te pawh Europe-a defender langsar an ni pha. 

Player dang Borussia Dortmund midfielder Thomas Delaney bakah Barcelona forward Martin Braithwaite leh RB Leipzig forward Yussuf Poulsen te hian mamawh goal khung turin theihna an ni.

•    UEFA-in friendly match tam zawk thlakna atan Nations League hi an buatsaih a, football ngainatuten ram inelna an ngaihhlut theih nana tih a ni.

•    Kum 2018 aṭang khan khelh ṭan a ni a, UEFA hnuaia ram 55 chu league pali League A, League B, League C leh League D-ah ṭhen an ni.

Nations League-ah hian League A aṭang chauhin a champion theih. League A-a group pali aṭangin a sang ber ṭheuhin finals an lut. Finals hi semifinal leh final-ah ṭhen hran a ni a, 2020–21 season finals hi October 6-10, 2021-ah khelh a ni dawn.