Emirates Stadium-ah Liverpool Unai Emery naute an ṭha reng em?
Manager thar Unai Emery kaihhruaina hnuaiah Arsenal an 'harh thar' tih chu titi lengvak a ni mek a, Arsene Wenger-a'n a chhuahsan tak team hi an ṭha tawk tawh reng em tih chu zanin dar 11:00 hian fiahin a awm dawn; Emirates Stadium-ah Premier League champion tura rinkai Liverpool an mikhual dawn.
Jurgen Klopp-a'n a din thar Liverpool hian an khelh dan phung an thiam bel tawh a, an tan Gunners khelmual hi hlau leh khur chunga luhna tur a ni lem lo - champion lai leh hmahruaitu ni bawk Manchester City el phak ber an nih avangin inrintawkna sang tak nen North London an pan ang.
Team dinhmun
Premier League season kal laiah match 10 an khel tawh a, team pathum - Man City, Liverpool leh Chelsea te chu hneh loh tawng loa kaltluang mek an ni; Reds hian point 26 hmu tawhin Pep Guardiola naute aia an hniamna chu goal an khung tlem zawk vang chauh a ni.
Match hmasa pahnih an chak loh hnuah Arsenal an kaltluang a, point 22 hmuin Champions League khel phak chin palina an ni mek. Liverpool an hneh a nih chuan an inthlauhna a zim sawt dawn a, an tlawm a nih erawh chuan nomawi a hla sawt ang.
Team pahnih an intawn hnuhnung pathumah Liverpool vawi thum an chak a, vawi hnih an inhnehtawk thung - Arsenal an chak ve lo. League match hnuhnung pangaah hian goal 27 ngawt lutin, season hmasa khan Emirates Stadium-ah 3-3 a ni; zaninah goal a lut hnem a nih pawhin thil mak a ni dawn lo.
Emery-a Laipui
A zawnin match 13 chhung an tlawm lo ta a, heng zinga 12-ah hnehna an chang thei. Arsenal hian club lian hmachhawn turin tun ang dinhmuna inrintawkna an la nei thei lo a nih chuan engtik hunah nge an neih chuan ang?
Kar hmasa khan match thum an khel hman a, tun karah pawh League Cup an khel leh tawh. Match an neih hnem avangin Unai Emery-a'n player a siksawi nasa thei hle. Hector Bellerin, Nacho Monreal leh Sead Kolasinac te dinhmun a la chiang lo vek a, goal nawr na tak Reds laka an tlarhnung rem phui hi hna tautak a tling dawn.
Hrem vangin rawlthar Matteo Guendouzi a inlan thei dawn lo a, season tawpa contract tawp tur Aaron Ramsey chu League Cup-ah chhawr a nih bawk avangin zaninah bul a ṭan dawn em tih a chiang lo. Crystal Palace nen an inhnehtawk ṭuma thlak ngai Mesut Ozil erawh a chungah mawhphurhna a lian zual ang.
Reds an vul
Mohamed Salah, Sadio Mane leh Roberto Firmino te inkawp hi Premier League hmatawng hlauhawm leh in man bera chhal ngam an ni mek a, anni pathum hian tlarhnung inremphui thei rih lo Arsenal sut hawn an harsat dawn lo.
Anni pathum thlawp tur hian midfield an nei chhah tawk. Cardiff an hneh ṭuma inlan thei lo midfielder Naby Keita leh Jordan Henderson te la dam lo mah se, James Milner leh Fabinho te an inpeih tawh bakah tun hnaia khel ṭha thei tak Xherdan Shaqiri, Georginio Wijnaldum leh Adam Lallana te an la nei bawk.
Goalkeeper manto Alison leh a hmaa ding Virgil van Dijk te hi thlamuanpui tham an tling a, league match 10 aṭanga goal li chauh chhuah thei khawpa phui an ni. Chutihrualin an khingpui tur Gunners hi goal 24 ngawt khung tawh an nih avangin Reds tlarhnung hi eng tianga khauh ṭha nge a nih tih chu fiahin a awm ve bawk ang.