Chanmari 2-0 Electric; Red card 5!

Chanmari FC-in coach Chawngthan-sanga hnuaia a vawi khat nan hnehna an chang a, nimin tlai khan Mizoram Premier League inkhel hmuhnawm takah Electric Veng 2-0 in an hneh.

Inkhel boruak sang takah player panga hnawhchhuah an ni a, hun tawp hma hretin EFC midfielder Isak Vanlalpeka chu hnawhchhuah niin injury time-a buainaah Electric player Vanlalhmangaiha leh C. Zonunmawia bakah Chanmari player Lalmuanzova leh C. Lalrosanga te red card pek an ni.

EFC an vanduai

Electric Vengin bul an ṭan ṭha a, goal chance pawh an ngah. Vanlalremsanga'n crossbar a pet per bakah chance ṭha dang ṭum hnih a hlah a, R. Lalthanmawia a vanduai zui bawk.

Chanmari erawh goal hmaah an vannei a, Immanuel-a'n first half tawp hma hreta box hmaa a volley sawt chu a goal a, a hmaa bet zawk Chawnga hote dinhmun vawi leh khatah a ṭha thut.

Second half-ah Chanmari-in counter attack hman ṭangkai an tum a, inkhel thunun thei lo mah se minute 85-naah Jeremy Laldinpuia cross chu Vanlalbiaa Chhangte-in a pet goal.

Electric Veng lamin nawr viau tum mah se ball awmze nei an inpe thei lo a, goal hlauhawm an nei thei meuh lo.

Goal hniha an chak avangin Chanmari-in head to head ah Electric Veng an khum chiah a, point thum chiaha inthlauin match khat leka inlehthal thei an ni.

Chawnga a lawm

Chanmari coach Chawngthansanga chuan, "Ka enkawl ṭantirh khan kan vanduai a, tunah chuan kan vannei ve ta. Hnehna kan chang hi ka lawm hle," tiin Vanglaini a hrilh.

Electric Veng coach Vanlalsawma Colney chuan, "A tira kan chance neih kan hmang ṭangkai lo kha a pawi a ni. Kan khelh hma bakah theihtawp kan chhuah zel ang," tiin a sawi.

Coach pahnih hian red card chung-chang chu an hmuh chian loh avangin an sawi zui duh lo.

MPL tawp lam inum

Season a tawp hnai a, MPL inûm boruak a sang. Inkhel piah lamah dinhmunin 'pressure' a keng tel a, fans neih ṭhat, boruak ngam, tawnhriat neih ṭhat leh haisen a pawimawh zual dawn.