Mourinho-a'n beiseina a nei sang

Premier League table-a pariatna dinhmun luah mektu Manchester United manager Jose Mourinho chuan kum a tawp meuh chuan an awmna a danglam tur thu a sawi.

Portuguese manager chuan, "December a thlen hunah chuan tuna kan awmnaah hian kan awm tawh dawn lo a, dinhmun duhawm zawkah kan awm tawh dawn a ni," a ti a, United fan-te tana thu hriat nuam a sawi.

Red Devils fan-te tan thu hriat nuam dang a awm. Zanin dar 6:00-a Bournemouth an lenchilh hunah Antonio Valencia chu a inkhel thei tawh dawn a, Jesse Lingard leh Alexis Sanchez chu Cherries hmachhawn turin an fit ṭha bawk.

Mourinho chuan nomawi sawi thei dinhmunah erawh an la din loh thu a sawi a, Premier League champion sawi ri tur chuan top four-a invawrh kai phawt a ngai, a ti.

Real Madrid nena sawizawm mek manager chuan, "Top four pawn lama in awm chuan champion sawi rik a mawi lo a, a sang pali zingah tel ve phawt a ngai a ni.

"Top four-ah hian kan invawrhkai thuai ang tih ka ring bawk a, chuta ṭang chuan champion chungchang kan sawi thei ang a, a boruak pawhin min chiah ve ṭan dawn chauh a ni," tiin a sawi.

Mourinho hi October 6-a Newcastle United an hneh ṭumin ṭawngkam mawi lo a hmangah puh a ni a, Football Association chuan thubuai an siamsak. Mahse, he thutlukna hi an khinglet a, an hlawhtling.

Chelsea boss hlui chuan, "Engmah tihsual ka nei lo tih ka chian avangin club hnenah pawh khinglet turin ka ngen a ni reng a ni," tiin a thiamthu a sawi.