Vawiin tlai dar 5:00-ah Aizawl FC leh Bagan

Aizawl FC-in tun season I League match hmasa berah Shillong Lajong an hneh lo a, vawiin tlai 5:00 hian Salt Lake Stadium-ah Mohun Bagan nen an inkhel dawn. Mariners hi an match hmasa berah Gokulam Kerala nen an inhnehtawk avangin Mizo club tan Kolkata club ṭha hmachhawn a harsa ang.

Beisei pha lo AFC

Aizawl FC-in season liam ta I League best coach Gift Raikhan an lalut a, state pawn player leh foreigner nen ṭangkawp chungin MFA Super Cup leh I Day Football-ah nomawi an hlawh chhuak thei lo a, Mizoram Premier League-ah pawh an khelh tawh chin aṭanga teh chuan team ṭha ber an ni lo.

MPL-ah AFC hian match 10 an khelh

aṭangin point 19 an hlawh chhuak a, khelh zat inangah Chhinga Veng chiah pha lo mah se an ṭhat dan ber an hre fuh thei lo. Tualchhung inelna sang berah hian match hnuhnung pahnihah Bethlehem Vengthlang (1-0) leh Ramhlun North (4-0) an hneh a, MPL7-a an chak zawn hmasa berah hian mak takin an chhawr rim loh zawk player an luhtir a, an result erawh a ṭha thung.

Chutihrualin inkhel hnuhnung pahniha an chak zarah I League-ah an ngaihtuahna an sawrbing thei dawn a, Shillong aṭanga point hmu loa an rawn haw tawh avangin Kolkata-ah chuan point an hlawhchhuah ngei a ngai tawh ang.

Lajong nen hian AFC foreigner Alfred Kemah Jaryan, Leonce Dodoz Zikhai, Kareem Omolaja leh Ansumanah Kromah te chu danglamna thlen thei an ni lo a, inlan lo Bektur Talgat Uulu lah Lammuala a khelh dan aṭanga tehin a inlan ve lo pawh a mak lo. Mizo club-in sum sengin foreigner panga an lalut a, state pawn player an lalut chunga foreinger nei lo Shillong Lajong an hneh loh hi mualphona tiin a sawi theih.

Engtin zel?

Aizawl FC khingpui tur Mohun Bagan hian tun hma angin thawm an nei lian tawh lo a, amaherawhchu an la ṭha reng. Mariners tlarhnungah hian Mizo club defender hlui pahnih Lalchhawnkima leh Eze Kingsley te an inkawp a, I League-a Aizawl FC champion ṭuma player pawimawh William Lalnunfela pawh squad-ah a awm ve bawk.

Kolkata club innghahna tur chu Gokulam lama goal khungtu Henry Kisekka leh Asier Pierrick Dipanda Dicka te an ni a, I League-a tawnhriat nei ṭha ve ve an nih avangin Mizo club tan fimkhur a ṭul dawn a ni.

Inkhel dang

Zirtawpni tlai khan Chennai City-in Churchill Brothers an mikhual a, 2-2 in an inhnehtawk. Chennai-in Nestor Gordillo hmangin minute kuana lekah hma an hruai a, Churchill Brothers-in second half-ah Nenad Novakovic (51') leh Israil Gurung (58') hmangin an lehthal mah se Goan club defender Wayne Vaz-a'n an lamah a tihluh zui avangin point khat ve ve an hlawh chhuak.

Chennai City hian Pathianni tlai dar 5:00-ah Gokulam Kerala an lenchilh ang.