Rooney hoin DC United an tla

Manchester United striker hlui Wayne Rooney-a'n DC United a pan hnuah danglamna thlenin MLS playoff hial inpetkai pui mah se a beisei ang result a hlawhchhuah chhunzawm lo a, playoff-ah hian penalty pet goal loin Columbus Crew hneh loin an tla.

DC United tana Frederic Brillant goal hmahruai chu Crew lamin Federico Higuain hmangin an sut a, extra time khelh a ni. AC Milan striker Gonzalo Higuain unaupa Federico bawkin Columbus tan goal khung leh mah se DC lamin DeLeon hmangin an chhang leh a, penalty pet a ni.

Kum 33 mi Rooney hian penalty hi pet hmasa berin a pet goal lo a, Columbus lakah penalty hmangin 3-2 in an tlawm. England captain hlui chuan, "Penalty-a chak lo zawk nih chu a hrehawm takzet a, mahse tun hnaia kan khelh dan leh hnathawh en ila, lawm tur kan ni," tiin chak lohna karah lawmna a zawng.

Everton striker hlui hian June khan DC United hi a zawm ve chauh a, hetihlai hian DC hi Eastern Conference-ah a mawngphah an ni. Mahse, Rooney-a'n goal 12 khunga assist vawi sarih neiin playoff a hruai thleng a, a aia sang zawk erawh an tlin ta hrih lo.