Quarterfinal-ah Federer leh Djokovic

Roger Federer leh Novak Djokovic te chuan Paris Masters khelh laiah an khingpui hnehin quarterfinal an lut. He inelnaah hian world number 1 ni lai Rafael Nadal chu inlan tum mah se hun tepter tawh takah hliam vangin a inhnukdawk.

Ningani zan inkhelah world number 3 Federer chuan darkar khat leh minute 13 chhungin Fabio Fognini chu 6-4, 6-3 in a hneh. Set hnihna an khelh lai hian 4-3 a nih hnuah Federer hian break point vawi hnih inchhanhimin set a la zui thei hram a ni.

World number 2 Djokovic a vannnei thung, a khingpui tur Damir Dzumhur chu hnungzâng na vangin a inhnukdawk a, kum 31 mi hian a match hmasa zawkah harsa lo takin hnehna a chang tawh thung. ATP ranking chhuak tharah Nadal khumin a chung berah a awm dawn tih a chiang tawh.

US Open champion hian semifinal lut tur chuan hna hautak a paltlang ngei a ngai tawh dawn niin a lang, quarterfinal-ah Marin Cilic nen an intawng dawn. Cilic hian winners vawi 29 vaw chhuakin seeded pakuana Grigor Dimitrov chu 7-6 (7-5), 6-4 in an hneh.

Season hmasa ATP Finals champion Dimitrov hian world number 19 ni chungin kum tawp a hmang dawn tih a chiang tawh a, hetihlai hian Cilic erawhin match khat dang hnehna a chang leh a nih chuan a thiam pariat inelna ATP Finals-ah hmun a chang phak chiah dawn a ni.