Ramhlun North hmaah Police tawlh thlu

Ramhlun North-in Mizoram Premier League Season 7 ngaihnawmna belhchhahin Ningani zan khan Mizoram Police 2-1 in an hneh a, semifinal lut tur hriatthiam a har leh ta sawt.

Lammual inkhel hmuh-nawm takah Ramhlun North-in Lalremruata hmangin hma an hruai a, Police-in Lalramtharmawia freekick hmangin an siphurh sut mah se second half-ah Lalliansanga'n (Notea) Ramhlun North chakna goal a khung.

Police an ṭha

Mizoram Police-in hrem vangin Lalfakzuala an chhawr thei lo tih lo chu an player ṭhate an hmang thei a, match thum a zawna man of the match ni thei F. Lalmuanawma chu goalkeeper niin hmatawngah Malsawmfela awmin ball sem tura R. Malsawmtluanga a awm bawk avangin player thlir chuan an ṭha.

Ramhlun North hi foreigner pathum zinga pahnih Waheed Adekunle leh John Ampong ten an kalsan tawh a, an kawl chhun Bamba Musah pawh bench-ah dahin Mizo hlangin an khel .

Bul ṭan ṭha

Ramhlun North-in bul an ṭan ṭha a, Lalliansanga ball vawrh luh chu Lalremruata'n keeper Muanawma rawn tlan chhuak chu a pet khum a, minute sarihna lekah 1-0 in hma an hruai nghal.

Police-in an match hnuhnung berah Chhinga Veng hneh mah se champion lai hneh tur hian tha an seng tam a, ni khat chiah an awl avangin ngai an awh lo tih a lang. Ball sem thiam MS-a'n ṭum dang a pha lo.

Amaherawhchu first half injury time-ah box pawn chiahah freekick an hlawh chhuak a, Mamawitea rawn ding chhuakin Hualngohmun tlangval hian goal kilah a khung. Police goal nawr a na lo chungin halftime hmaa si phurh an sut theih avangin chak tura rinkai an ni.

Hu Hu Hu

Ramhlun North-in inrintawkna an neih theih nan ṭantu an nei ṭha a, an supporter-ten thum ṭha takin 'Hu Hu Hu' an ti rual a, inkhelah nghawng lian tak a nei a, an team an phur phah tih a lang.

Minute 64-naah Ramhlun North bawkin goal an khung a, Lalmawizuala ball vawrh luh chu Notea'n keeper tauh khumin a vawi hnih nan hma an hruai nawn a, inkhel a nung ta hle.

Ramhlun North player handball zarah police-in penalty an hmu a, Sawmfela a rawn pen chhuak a, Eddie chuan a dang a, Ramhlun North keeper hi man of the match-a thlan a ni.

Hemi hnu hian Police goal nawr a na lehzual a, hun tawp hma chiaha an corner kick hmuh pawh goalkeeper nen lut vek mah se goal an khung thei lo a, Ramhlun North-in hnehna an chang.

Eng nge an sawi?

Ramhlun North coach Laltlantluanga chuan, "Kan beisei phak bakin kan khel ṭha a, kan result-ah kan lawm hle a ni. Kan keeper-in penalty a dan avangin kan vannei tel tih kan pha lo. A pawimawh ber point thum kan hlawh chhuak a, kan khelh leh turah theihtawp kan chhuah zel ang," a ti.

Mizoram Police coach BS-a Colney chuan, "Match fitness kan neih loh kan tuar a, kan chau ve bawk a ni. Tunah chuan kan awm hahdam ang a, karleh lama Bethlehem Vengthlang kan hmachhawn hunah chuan point thum kan hlawhchhuah ngei ka beisei," tiin Vanglaini a hrilh.