Conte-a'n Real a enkawl dawn lo?

Real Madrid-in Julen Lope­tegui an ban hma aṭang tawhin Antonio Conte chu Spanish club nen sawizawm ni mah se tun dinhmuna a lan dan chuan Real a enkawl a rinawm loh.

Chelsea boss hlui hian Real enkawl turin 'demand' a siam a, mahse a duhnate hi Real Madrid chuan an tih hlawhtlin theih a rinawm loh a, European champion tan khaw dang hawi a ngai dawn niin a lang.

Conte hian Real a zawm dawn a nih chuan kum thum contract, a coaching staff panga chhawm tel leh transfer-a thuneihna pumhlum neih a duh a, mahse Real hian hemi tih hlawhtlin ai chuan coach dang zawn an duh zawk.

Kum 2006-09 chhunga Real Madrid president lo ni tawh Ramon Calderon chuan, "Conte beisei ang hi chu Florentino Perez-a tih hlawhtlin châk zawng a ni lo," tiin Conte zawk a inphah hniam a nih loh chuan Real President hian Italian manager duhna hi a tih hlawhtlin loh tur thu a sawi.

A nghetin Solari?

Real hi coach lailawk San­tiago Solari enkawlna hnuaiah an awm mek a, an match hmasa berah Melilla chu 4-0 in an sawp a, mahse an hneh club hi third division club an ni - zanin dar 8:45-ah Real Valladolid nen an league match hmasa ber an khel ang.

Solari hi Real Madrid B team coach nilai a ni a, kum 2016 khan Zinedine Zidane chuan reserve team aṭangin coach puitling hna a lo chelh tawh bawk. Hriat tel atana ṭha erawh Zidane khan Carlo Ancelotti hnuaiah assistant manager hna a chelh hman a, Solari erawh senior team lama la inhnamhnawih ngai lo a ni.

Hetichung hian Solari-a'n Real a enkawl chhunzawm mai ang em, tih chu zawhna awm a ni a, Calderon chuan, "Engmah hi sawi lawk theih a ni lo," a ti a, Solari tan Real enkawl hlen theihna remchang a awm thu a sawi.

Player a nih laia Real Ma­drid tana khel tawh coach hian zanin bakah Viktoria Plzen (Champions League) leh Celta Vigo te an la hmachhawn dawn a, he result hian Solari hma hun thui takin a hril ang.

Coach dang maw?

Real Madrid hian an beisei angin Conte an be thlu mai thei lo a, tun dinhmuna Real-in an biak zingah Belgium boss Roberto Martinez, Tottenham boss Mauricio Pochettino leh Manchester United manager Jose Mourinho te an tel.

Everton pawh lo enkawl tawh Martinez hi Real enkawl thei ber tura ngaih a ni a, Presi­dent-in player lei tur thlenga thutlukna a siamna hmunah kum 45 mi manager hian Conte anga thuneihna tam tak neih a dil a rinawm lo - Real a enkawl theih chuan a lawm tawk ang.

Hetihlai hian Belgian FA chuan an coach chungchangah dawr an la nih loh thu sawiin, "Roberto hian kum 2020 thleng Belgian Football Association nen contract a nei a, amah dawr duh an awm a nih chuan keimahni kaltlanga an dawr a ngai ang," tiin thuchhuah an siam.

Martinez bakah hian Spurs manager Pochettino hming lamrik ni mah se Argentine manager hian nipui lai khan Real sawmna hi a lo hnar tawh a, tunah a pawm thut a rinawm lo - Real enkawl a, president thuhnuaia awm ai chuan Spurs-a thuneihna pumhlum neih a duh zawk.

Perez duhthlan Mourinho

Real president hlui Calderon chuan, "Real hian Martinez, Poch leh Mourinho an be vek a, contract nei lai vek an ni. Mourinho hi Perez-a'n zah taka a biak coach awmchhun a ni mai thei a, a chetsual lai pawhin a thlawp tlat reng a ni.

"Coach, mahni tihsual, midang puh ching tak a ni a, mahse tunah hian free ngat se chuan Real coach a ni leh daih tawh ang," tiin Portuguese manager chuan Manchester United-ah contract nei lo se chu Real nen inremna an ziah tawh a rin thu a sawi.

Arsenal manager hlui Arsene Wenger hming chu lam rik zingah a tel a, mahse Calderon chuan kum 22 chhung London club-a lo cham tawh coach hian Spanish club hi a pan duh a ring lo.

Real President hlui chuan, "Perez hi line up-ah thleng a inrawlh a, a player duhzawng a thlak thut thut a, football director an nei lo a, Wenger-a pan duh chi a ni lo. Arsene chuan hma hun thlirin ruahmanna a siam ṭhin a, Real-ah chuan chutiang chu a ni si lo," tiin a sawi.