Lin Dan hnehtu India tlangval

India tlangval bad­minton khel thiam hriat hlawh lo Subhankar Dey chuan world cham­pion vawi tam tak ni tawh Lin Dan chu 22-20, 21-19 a hnehin, Ningani khan SaarLorLux Open Badminton Cham­pionship-ah quarterfinal a inhlangkai.

World number 64 Subhankar hian hnehna chang turin minute 45 hun a hmang a, Olympic gold medal pawh vawi hnih dawng tawh Lin Dan lakah a khel ṭha hle - Chinese shuttler hi kum 35 mi a ni tawh a, a vanglai angin a che rang tawk tawh lo deuh tih erawh hmuh hmaih theih a ni lo.

Thla hmasa mai khan Indian shuttler chhuanvawr Kidambi Srikanth chuan Denmark Open-ah Lin Dan hi a lo hneh tawh bawk a, world champion vawi nga ni tawh hi a hun a inher liam mek zel niin a lang.

Inkhel dangah Com­monwealth Games gold medallist Parupalli Kashyap chuan khawtual tlangval Alexander Roovers chu 21-14, 21-12 in a hneh ve bawk. Quarterfinal-ah chuan Subhankar hian seeded pasarihna Toby Penty a hmachhawn ang a, Kashyap pawhin French tlangval Toma Junior Popov a bi tum zui ve leh bawk dawn a ni.