Wolff-a‘n Hamilton chelh theih beisei

Mercedes team boss Toto Wolff chuan Lewis Hamilton chu chelh belh theih ngei a beisei a, a driver duh lai contract thar chungchang pawh tun hnaiah an sawi ṭan theih ngei a rin thu a sawi bawk.

Britain tlangval Hamilton hian Pathianni khan F1 world title chu a vawi sarih nan a chawi a, car intlansiakna sang berah hian Michael Schumacher nen record nei ṭha ber an ni.

Hamilton-a‘n tun season tawp thleng daih bak hi Mercedes tan contract a nei tawh lo, a team ngaiah awm chhunzawm a duh thu sawi zauh tawh mah se inbiakna tak erawh an la nei lo. Mercedes lam chuan an driver hi chelh ngei an duh thu an sawi zing ta hle.

Wolff chuan, "A vawi sarih nan a champion hlim a ni a, tunah chuan contract sawi hun a ni lo. Hlawhtlinna kan chan hi nuam leh hlimawm taka lawm hun a ni zawk.

"Ni rei lote kan nghak a nga, chumi hnuah chuan contract chungchang pawh kan sawi thei ang. Lewis nena kan inkar hi infiamna leh sumdawnna piah lam thil a ni a, ṭhian ṭha tak niin kan inring tawn hle," a ti.

Driver ropui chungchang sawi zuiin Wolff chuan, "Michael sulhnu kha a ropuiin a chhuanawm hle, ani bakah hian Juan Manuel Fangio leh Ayrton Senna te pawh mi hriat reng tawh tur an ni ang.

"Lewis pawh hi driver ropui bik zingah chuan a tel, a ṭha leh chungnung ber sawi theih ni lo mah se nakinah mi te chuan kan chanchin hi an la sawi ve ngei ang, sulhnu ropui hnutchhiahtu zinga kan awm thei hi lawmna tur a ni," a ti.