Indian Super League: Hriat tur pawimawhte

November 20 a lo her chhuak ang a, Indian football ngainatute chuan television lamah an ngainat ber Indian club-te inkhel en tur an nei leh dawn ta. 

Indian Super League chu November 20-ah khelh ṭan a ni dawn a, zan dar 7:30-ah Kerala Blasters leh ATK Mohun Bagan-ten season thar atana match hmasa ber an khel ang. 

I League hlutna vawngtu tia sawi ni ṭhin East Bengal leh Mohun Bagan-ten ISL an khelh dawn tak avangin inelna hlutna hi a sang sawta ngaih a ni bawk a, football atchilhtu Kolkata fans tam takin ISL an en dawn. 

ISL club hrang hrangin ram pawn player langsar tak tak an lak bawk avangin tun season ISL hian ngaihven a hlawh lehzual a, Mizorama football ngainatute pawhin Mizo player ṭan tumin an television an 'on' ang.

 

ISL-ah team 11 an inel dawn a, ATK Mohun Bagan, Chennaiyin FC, Bengaluru FC, Kerala Blasters FC, NorthEast United FC, Odisha FC, FC Goa, Jamshedpur FC, Mumbai City FC, Hyderabad FC leh SC East Bengal an inkhel ang. 

ATK hi champion lai an ni a, vawi thum ISL-ah an champion tawh - Bagan nen an inzawm tak avangin ATK Mohun Bagan tih an ni dawn. Chennaiyin hi vawi hnih champion tawh an ni thung. 

Bengaluru-in 2018-19 season khan nomawi an chawi a, Kerala Blasters-in 2014 & 2016-ah final lut mah se nomawi chawi an nei lo thung. NorthEast United-in semifinal vawi khat an khel tih loh chu chhuan tur an nei lo.

Odisha-in vawi hnih semifinal an khel tawh a, FC Goa hi season hma league round hmahruaitu an ni a, vawi hnih final an khel tawh bawk - season tharah AFC Champions League an khel ang. 

Manchester City neitu City Football Group chuan Mumbai City-ah 65% share an neih avangin ngaihven an hlawh thar a,  season hmasaa FC Goa coach Sergio Lobera enkawlna hnuaiah an khel ang. 

Mumbai City hian semifinal vawi hnih an lut tawh tih bak chhuan tur erawh an la nei rih lo. Jamshedpur FC-in 2017-18 season aṭangin ISL an khel ve ṭan chauh a, playoff pawh an la lut ngai lo thung. 

Hyderabad hian season hmasa aṭang khan ISL an khel ṭan ve chauh a, record chhuan tur an nei lo. League match 18-ah vawi hnih an chak ve a, table mawngphah luah chungin season an khar. 

East Bengal tan ISL-a an season hmasa ber tur a ni a, mahse sum an ngah avangin player an it zawng an hlah lo a, an season hmasa berah playoff inpetkai nghal an tum a nih pawhin a mak lo ang. 

Premier League-ah substitution pathum chauh siam theih a nih avangin player-te an inhliam nasat phah a, substitution panga tal neih theih duhin Liverpool boss Jurgen Klopp leh Manchester City manager Pep Guardiola-ten thawm an nei ring hle. 

Hetiang boruak karah hian Indian Super League chuan substitution panga neih theih turin a rel. Hei hi Covid-19 vanga fixture a tawt vang a ni a, player inthlak an tam theih chuan player-te an chau lo sawt ang a, inhliam an tlem sawt theih a rinawm. 

Chutihrual chuan player panga thlak theih ni mah se inkhel a tihbuai lutuk loh nan player panga thlak hi substitution vawi thum siamah hman zawh vek tur a ni a, player pakhat zelin substitution a siam theih dawn loh tihna a ni. 

Substitution hi player panga phal a nih angin vawi nga inthlak thei ta se, team pahnihin an substitution hmang zo ve ve dawn se, vawi sawm ngawt chu inkhel tih khawtlai a ngai dawn tihna a ni a, hetiang laka inven nan hian substitution pathuma siam zawh tura tih a nih phah. 

ISL club tinin ram pawn player, panga aia tlem lo an neih ngei ngei a ngai a, pasarih aia tam neih a thiang lo thung - an zinga pakhat chu Asian player a nih a ngai bawk. 

East Bengal, FC Goa leh Hyderabad-ten ram pawn player paruk ṭheuh an nei a, anni tih loh ISL club dang zawngin 'foreign quota' hnawh khatin ram pawn player pasarih ṭheuh an nei thung. 

Match tinah Indian player paruk talin inkhel bul an ṭan ngei ngei tur a ni a, team khatah ram pawn player panga aia tamin khelmualah hun an hman a thiang lo bawk a ni.

ISL club-te hian match an khelh dawn apianga an squad theh luhah 'developmental player', player beiseiawm pahnih tal an dah tel tur a ni a, anni hi January 1, 2000 hnua piang an nih ngei ngei a ngai.

Team 11 an inkhel kual ang a, a tawpah a sang paliin playoff/semfinal double-leg an khel ang a, final hmangin ISL champion tur zawn a ni leh ang. 

Season hmasa ISL-ah khan match 95-a awm a, tun season-ah team pakhata an pun tak avangin match 115-a awm tawh dawn a, double round-robin format tho hman tur a ni. 

ISL chuan round 11 atan fixture a tichhuak tawh a, fixture dang erawh December-ah tihchhuah tur a ni - hei hi Asian Football Confederation fixture ngaihchan vang a ni. Goa-in Champions League an khelh dawn bakah Bagan-in AFC Cup an khel dawn. 

Tarlan tawh ṭhin angin Covid-19 vangin inelna hi Goa vekin a thleng dawn a, Jawaharlal Nehru Stadium (Fatorda), Tilak Maidan Stadium (Vasco) leh GMC Athletic Stadium (Bambolim) ten inelna hi an thleng dawn a, training ground 12 chu ISL club-te tan sem a ni bawk.