Liverpool lakah Arsenal an tlawm lo

"Arsenal khelmuala point hmuh hi result ṭha a ni a, hmalam panin kan kal zel ang," tiin Liverpool manager Jurgen Klopp chuan a sawi a, he thu hian Inrinni zan Premier League inkhel hmuhnawm chanchin a sawifiah.

Emirates Stadium-ah Arsenal goalkeeper Bernd Leno-a ball dan chhuah fuh tawk lo chu Reds tan James Milner chuan minute 61-naah goal hmahruai atan a khung a, hun tawp nan minute riat chauh a awm tawh tihah Liverpool keeper Alisson aia ṭuan rang Alexandre Lacazette-a'n si phurh a sut, team pahnih hi 1-1 in an inhnehtawk.

Liverpool hian league match 11 an khelh tawhah chak loh an la nei lo a, Klopp thu sawi angin tun hnai inelna hrang hranga match 14 chhung chak loh nei loa kal tluang Gunners laka point hmuh hi result ṭha a tling; chutihrualin an intawn hnuhnung vawi sariha an hneh theih loh Reds laka tlawm loh hi North London club tan chanchin ṭha a ni ve bawk ang.

Emirates a nung
Arsene Wenger-a'n season 22 chhung a chamchilh hnuah Arsenal a chhuahsan a, a hun hnuhnung lamah an khelmual Emirates Stadium chu mikhual tana inkhelh harsatna hmun tia sawi tur a ni lem lo - season hnuhnung berah phei chuan inkhel entu ngah ni ṭhin hi fans lamin an phatsan hman ang hiala ngaih theih a ni.

Mahse, Unai Emery a rawn lan hnuah boruak a danglam. Player tin an tlan tam a, an thawkrim em em vek. Liverpool lakah Henrikh Mkhitaryan, Mesut Ozil, Pierre-Emerick Aubameyang leh Lacazette ten a vawi khat nan inkhel bul an ṭan rual.

Inkhel ṭan phat aṭangin Arsenal player an phur a, keeper manto Alisson-a chhutsual karah Mkhitaryan chuan a tauh lut teuh hle; Aubameyang leh Lacazette te pawhin an hun ṭha neih an chhawr lo, goal ban hrulah an pet chhuak.

Goal an phurh hnuah Arsenal an beidawng lo. Mkhitaryan, Aubameyang leh Sead Kolasinac te lakchhuah niin, Alex Iwobi, Aaron Ramsey leh Danny Welbeck te dahluh an ni thung. Hun tawp hma deuhin Lacazette-a'n Alisson ball lak tur lak khalhin rang taka a vir pui hnuah goal chhak lam kilah a khung.

Arsenal tlarhnung a la nghet tawk lo a, chutih rualin Granit Xhaka leh Lucas Torreira te an inkawp fuh hnua an midfield phui sawt erawh hmuh hmaih theih a ni lo, Uruguay international Torreira hian an si phurh sut theihna hun a neihah Alisson paltlang zo lo mah se 'man of the match' atan thlan tur khawpin a khel ṭha.

Ban rinawm Van Dijk
Roberto Firmino ball pet-in bar a per dawp a, a per let khungtu Sadio Mane chu offside anga an ngaih a vangin a goal khung pawm sak a ni lo. Replay ennawn a nih hnuah erawh Senegal forward hian dan a bawhchhe lo niin a lang? Inkhel pumpui thlira langsar ber erawh Mane leh Mohamed Salah te ni loin tlarhnunga ban rinawm Virgil van Dijk a ni.

Liverpool manager Jurgen Klopp-a'n tlarhnunga an chak tawk lohna hre ranin Southampton aṭangin Van Dijk a lalut a, khawvela defender manto ber hi an lei sual lo. Ani hian Arsenal ball in pek tam tak a chhu chat a, ball hlauhawm tur nia ngaih pawh awlsam takin a chingfel thei deuh zel.

Van Dijk chungchangah 2017 nipui laia Saints nen an indawrna hmasa a tlawlh a, mahse Klopp a beidawng lo; January bazar hunah pound maktaduai 75 zetin a lei, a tirah a man a tam uchuak lutuk tiin sawiselna thawm awm mah se, tunah chuan a man hi a phu tih a langchiang tawh.

Netherlands international hian first half-ah box chhunga a ball dawn chu a awma la thlain, hnai takah a khung dawn niin lang mah se keeper Leno-a'n a dang hman lo. Ball kangah pawh Van Dijk bawk hlauhawmin goal bar a tauh per dawp bakah Leno tan hna hautak zet a siamsak bawk.

Season kal laiah Liverpool hian goal nga chiah an la chhuah a, champion lai Manchester City (3 goals) chiah anni aia chhuah tlem an awm. Reds hian goal khung an harsat lo tih kan hmu fo tawh a, tun season-ah league nomawi an chawi a nih chuan tlarhnunga ban rinawm Van Dijk hnathawh hi engti kanwg mahnin sawi nep theih a ni lo ang.

Point insem
Liverpool manager Jurgen Klopp chuan, "Point hmuh hi result ṭha a ni - Unai Emery pawhin hetiang tho hian a sawi ve thei ang. Inkhel kha thlir kir ila, goal khung theih ngeina tur hun kan nei a, kan khingpui khan an theihtawp tak meuh meuh an chhuah avangin beisei ang ngawtin thil a awlsam lo.

"Midfield-ah hmun kan pe zau hret ṭhin a, a bik takin Alex Iwobi kha kan hnaihchilh loh deuh avangin goal an khung theihna tur ball a pe chhuak a ni," a ti a, Mane-a goal khung an pawm loh chu pawm tur ngei nia a hriat thu a sawi bawk.

Arsenal manager Unai Emery chuan, "Hnehna chan kan duh a, kan khelh dan pawh a ṭha hle. Fans puihna kan dawng ṭhain anni zarah na takin kan nawr thei, kan thahrui pawimawh an ni. Point thum kan hmuh zawh loh avang erawh chuan 50% chauhin ka hlim rih.

"Minute 90 chhung kan khel ṭha em em a, kan chet ranna leh ball inpek kual dan pawh a dik tawh hle. Kan inhnehtawk vangin point khat kan hmu a, ka ngaihdan chuan hnehna chan kan phu," tiin a sawi.