Kolkata mipui ngawihtirtu David-a freekick ; Mohun Bagan 2 - 2 Aizawl FC

Aizawl FC-in substitute David Lalrinmuana freekick mawi tak hmangin injury time-ah Kolkata club lian Mohun Bagan laka an siphurh an sut a, Salt Lake Stadium-a Bengali mipui pungkhawm an ngawi ṭhap a, a hmuna Mizo inkhel awmchhunte an hlim thung.

Inrinni zan inkhelah hian AFC-in Lalkhawpuimawia (Mapuia) hmangin hma hruai mah se Bagan-in Lalchhawnkima leh Sony Norde hmangin an lehthal a. Mizo club an tlu sawp tawha a ngaih theih hnuah Zemabawk North tlangval David-a'n goal khungin MPL club-in point khat hlu tak an hlawh chhuak.

Mizo tlangval

Kolakta club-in I League striker ṭha pahnih Henry Kisekka leh Asier Pierrick Dipanda Dicka an kawl a, AFC midfielder hlui Yuta Kinowaki leh defender hlui Eze Kingseley bakah Egyptian midfielder Omar Elhussieny te an kawl avangin foreigner an nei ṭha zawk a, inkhelah pawh an chungnung zawk.

Mariners-in goal chance an nei nghal a, AFC tlarhnung an ṭhiat hnua Dicka-a goal chu offside vangin pawm a ni lo a, Mizo club an talbuai. Amaherawhchu minute 29-naah Kelkang tlangval Mapuia'n box pawn aṭangin kawh zetin goal kilah a pet lut a, Aizawl FC-in goal an khung hmasa zawk.

Bagan goal nawr let a na a, first half tawp hmain Mizo tlangval Chawnkima hmangin an siphurh an sut. AFC defender hlui hian box chhungah ball chang fuhin striker finishing ṭha te tih ṭhin dan angin goal kilah tak a dah a, halftime-ah 1-1 a ni.

Norde leh David

Second half-ah pawh Bagan an chungnung a, minute 64-naah Sony Norde a rawn inlar a, hun rei tak inhliam vanga khel thei lo Haitian Magician rawn lut hian boruak a tinung hle.

Norde hi khelmual chhungah a langsar nghal a, Mizo defender-te tan mangchhia a rawn thlen. Minute 69-naah Sony Norde chuan Duata tlan pelin goal ṭha zet a khung. Kolkata club-in goal hnihna an khung hnu hian goal dang a luh belh leh thuai dawn niin a lang a, mipui pungkhawm 16,000 thawm a ṭha hle.

Amaherawhchu, minute 73-naa luhtir David-a chuan injury time-ah 30 yards aṭangin freekick a pet a, ball petna hla mah se AFC midfielder ball dahna hi goal kil tak a nih bakah a kawh bawk avangin Bagan keeper Sankar Roy-a'n a dang thei lo. Zemabawk North tlangvalin Mizo club a chhan a, man of the match-ah Norde thlan ni tho mah se David hian Haitian forward ropuina tur a hliah khuh.

Engtin zel?

Aizawl FC coach Gift Raikhan chuan, "David hi freekick specialist a nih avangin siphurh sut nan a thiamna a pawimawh a, freekick kan hmuh chiah pawh khan beiseina sang tak ka nei a, amahah khan rinna ka nghat a, min tih hlawhtlin sak a ni," tiin Vanglaini a hrilh.

Gift chuan sawi chhunzawmin, "Tlarhnung a phui lo tih ka hria a, hun erawh ka mamawh dawn. Mizo mipuiin min nghak hram hram rawh u," tiin insiamṭhat theih a beisei thu a sawi.

Aizawl FC hian November 7 hian Neroca an hmachhawn dawn a, AFC khingpui tur hi Manipur club leh Gift-a club hlui a nih dawn avangin tun season-a Mizorama I League match hmasa ber tur hian ngaihven a hlawh ang.