An ṭhat dan berin AFC an lut em?

Aizawl FC-in goalkeeper-ah Gurpreet Singh an hmang a, tun season MPL-a an khelh dan thlirin I League-a bul ṭantu a ni hi a mak lo.

Position dang zawngah erawh coach Gift Raikhan-a'n chhawr tur tihfel a la harsat tih a lang. I League khel tur chauha ziah luh Kareem Omolaja chu defence laiah hmun nghet a chang niin a lang a, Shillong Lajong nen an inkhelh ṭumin Lalrinchhana Tochhawng nen inkawp mah se Bagan nen chuan Govin Singh nen inkawptir an ni thung.

Mual sirah forward anga hriat lar ṭhin Vanlalduatsanga chu left back-ah chhawr chhunzawm a ni a, right back-ah Hmingthanmawia awm nawn mah se ani pawh hi defence laiah a awm tam avangin right back-a chet dan a la bel tawk lo. Kolkata laka an tlarhnung a pawp nasat avangin an inthuam ṭhat ran a ṭul ang.

Midfield laiah Alfred Jaryan aṭangin team din a ni a, Bagan nen hian Paul Ramfangzauva chuan Bektur Talgat Uulu hman a ni a, Kyrgyzstani midfielder hi team tichak tura lak a ni nachungin starting eleven chan phak hi a harsat ve hle.

Wing-ah Lalrinfela chu dah nawn a ni a, tawnhriat nei ṭha Albert Zohmingmawia chu Ramhlun North nena a khelh ṭhat rah sengin F. Lalremsanga aia thlan a ni. Kelkang tlangval Lalkhawpuimawia (Mapuia) pawh MPL-a a khelh ṭhat zarah Leonce Dodoz aiah luhtir a ni a, Ansumana Kromah nen inkawptir a ni.

Lajong nen an inkhelh ṭum khan mak tak maiin Bagan laka goal khungtu pahnih Mapuia leh David-a te an dam ṭha reng chungin hruai an ni lo. Point thum hmuh theihna tura ngaihah point an hlawhchhuah tak loh avangin Aizawl FC coach Gift Raikhan-a'n training record thlir loin tawnhriat nei player a thlang a, point hlawhchhuah harsatna hmunah point khat an hlawh chhuak.

Thlirna Tawi
Mohun Bagan 2 - 2 Aizawl FC
MB : Lalchhawnkima 44'; Sony Norde 69'
AFC : Lalkhawpuimawia 29'; David Lalrinmuana 90+3'
Vawiin Inkhel Tur
Indian Arrows 5:00 PM Shillong Lajong
November 6, Thawhlehni
Real Kashmir 2:00 PM Churchill Brothers
November 7, Nilaini
Aizawl FC 2:00 PM Neroca

Team Dinhmun
# Team P W L D GF GA GD Pts
1 Quess East Bengal 2 2 0 0 5 1 4 6
2 Chennai City FC 2 1 0 1 6 3 3 4
3 Real Kashmir FC 1 1 0 0 1 0 1 3
4 Shillong Lajong FC 2 1 1 0 3 4 -1 3
5 Mohun Bagan 2 0 0 2 3 3 0 2
6 Churchill Brothers 2 0 0 2 2 2 0 2
7 Gokulam Kerala FC 2 0 0 2 2 2 0 2
8 Aizawl FC 2 0 1 1 3 4 -1 1
9 Minerva Punjab FC 2 0 1 1 0 1 -1 1
10 NEROCA FC 2 0 1 1 1 3 -2 1
11 Indian Arrows 1 0 1 0 1 4 -3 0