PSG tan Mbappe bawk
Paris St-Germain chuan kum 58 chhung zet Tottenham record lo ding tawh chu an khum ta, French Ligue 1 hmahruaitu hian a zawnin league match 12 chhung hnehna an chang tawh.
PSG hian Zirtawpni zan khan Lille 2-1 in an hneh a, French rawlthar duhawm Mbappe-a'n goal hmahruai a khung bakah player manto ber Neymar khung tur a siamsak bawk.
Kum 1960-61 season khan Tottenhman chuan season tir lam an match hmasa 11-ah hnehna an chang thei a, European league lian panga zingah he record hi khum thei an awm har hle; tunah chuan match 12 hnehna chang PSG-in an khum ta.
French champion Paris St-Germain hian anmahni hnaih bertu Lille an hneh avangin point 11 zetin hma an hruai fal tawh a, nomawi an kawl lai humhim thei turin an dinhmun a ṭha leh tawh hle.