A vawi hnih nan Real an chak leh ta

Santiago Solari enkawlna hnuaiah Real Madrid chuan a zawnin vawi hnih hnehna an chang ta. Inrinni zan khan an mikhual Real Valladolid chu 2-0 in an hneh a, an league match hnuhnung paruka an vawi khat chakna a ni.

Real Madrid hian goal khung tur erawhin an nghah rei a ngai a, minute 80 hnu lamah goal an khung ṭan ve chauh - Vinicius Jr chuan minute 83-naah goal hmahruai a khung a, minute nga hnuah Sergio Ramos chuan an goal hnihna a khung ve leh bawk.

Barcelona an danglam bik lo. Rayo Vallecano laka hnehna chang turin minute 80 hnuah goal hnih khung an mamawh a, vannei takin 3-2 in hnehna an chang hram.

Atletico Madrid-in point khat lekin Barcelona hnaih thei mah se an hun ṭha neih an chhawr lo a, khualmualah Leaganes nen 1-1 in an inhnehtawk. Atletico tan Antoine Griezmann chuan goal hmahruai a khung a, minute 82-naah Guido Carillo chuan si phurh a sut a, point an insem.

Solari leh vanneihna

Inrinni zana league match an khelh hma hian Real Madrid-in an match hnuhnung panga aṭangin point khat chiah an hlawh chhuak a, heng zingah hian Barcelona laka 5-1 ngawta an tlawm chu a tel.

Real result-in a zir loh avang­in coach-in a tawrh a ngai a, Julen Lopetegui chu a hna aṭanga ban a ni. Reserve team coach Solari chu manager lailawk atan ruat a ni a, third division club Melilla chu Copa del Rey lamah 4-0 in an sawp tawh.

Santiago Bernabeu-a inkhel­a­h Real fan-ten beiseina sang tak an nei a, an beisei ang ngawt erawhin thil a awlsam lo. Valla­dolid tan Ruben Alcaraz leh Toni Villa ten woodwork an tih per ve ve a, Real fans thin phu a rang.

Chawlhlawk hman dawn phei chuan Real fan-ten an player rual an au el hial - mahse Brazilian rawlthar duhawm Vinicius Jr chuan beisei tawh loh hnuah goal hmahruai a khung a, Karim Benzema pe­nalty hlawhchhuah chu Sergio Ramos chuan penalty hmangin a khung ve bawk.

Solari leh a nau

Spanish football-ah club-in kar hnih chhung atan bak manager lailawk an neih a rem lo a, Solari-a'n Real hi a enkawl chhunzawm dawn em a hriat loh - result aṭanga teh chuan tun dinhmunah chuan a 'phu'.

Inrinni zan inkhelah Solari hian tlarhnunga regular player pali zinga pathum chu hliam vangin a chhawr thei lo a, kum 21 mi left back Sergio Reguilon chu a vawi khat nan khelhtirin a khel ṭha takzet.

B team lama vawi nga a chhawr tawh Vinicius Jr chu bench aṭangin a luhtir bawk a, a pu rinna chhangin goal a khung - Real badge fawp chungin a goal a lawm a, lawm takin Solari a kuah bawk.

Solari hnuaiah first team tana hmun chang ngai lo, kum naupang zawkten an hun ṭha neih chhawrin an khel ṭha a, hei ringawt pawh hi Argentine manager tan Real manager 'nghet' nihna remchang a ni.

Suarez a danglam lo

Season ṭantirah beisei a phak loh avangin Luis Suarez 'tar' thu an sawi nasa hman a, amah ngei pawhin kum 31 mi a nih tawh avangin Barca tan amah thlaktu tur zawn a ṭul thu a sawi.

Mahse, Uruguayan striker hian a tar tawh tih chu 'thu' mai a nih thu khelmualah a pholang leh ta - Vallecano lakah goal hnih a khung a, Real lakah hattrick a siam tawh bawk avangin a match hnuhnung pahnihah goal nga a khung!

Liverpool striker hlui hian minute 11-na lekah goal hmahruai a khung a, mahse mualneitu team-in Jose Pozo leh Alberto Garcia hmangin an chhanglet a, rei tak chhung chu hma an hruai hman.

Mahse, hun tawp nan minute thum chauh a awm tawh tihah Ousmane Dembele chuan si phurh a sut zo a, minute 90-naah Suarez chuan chakna goal a khung zui. Barca an vannei a, Rayo erawh an vanduai.