Djokovic lakah Federer chak lo

Roger Federer-a'n tennis a khelh hunchhunga a nomawi 100-na chawi turin a nghah leh rih a ngai dawn. Inrinni zan khan Novak Djokovic nen Paris Masters semifinal-ah an intawng a, inhnehtawk taka set thum an khelh hnuah a chak lo zawkah a ṭang.

Player ropui pahnihte hi an vawi 47 intawnna chiah a ni a, tun hnaia khel ṭha tak Serbian tlangval hian 7-6 (8-6), 5-7, 7-6 (7-3) in hnehna a chang, nizan khan Dominic Thiem hnehtu Karen Khachanov nen final an khel zui a, he thu buatsaih lai hian result kan hre hman lo.

Kum 31 mi Djokovic hi tun hnaiah match 22 chhung a chak zawn tawh a, Paris Master hi a chawi thei a nih chuan Rafael Nadal-a'n Masters title a lak zat 33 a nih rual chiah dawn; champion zo lo pawh ni se tun kara ranking chhuak tharah chuan world number 1 dinhmun a luah dawn tho a ni.

Darkar khat leh minute 14 an inkhelh chhungin kum 37 mi Federer a khel chhe lo a, chutihrualin hun pawimawh lai taka point a hmuh ṭhin ang kha a hmuh tak loh avangin a vanglai a pel tih chu hmuh hmaih theih a ni lo - amaherawhchu a thiam ho zingah pawh tawhkhirh berte zingah a la tel phak.

Grand Slam vawi 20 champion tawh Federer chuan, "Novak hi a khel ṭhain a kal tluang tih chu phat rual a ni lo, harsa leh lak har tak tura ngaih pawh a vaw let zel thei," tiin a sawi.

A khelh danah a lawm thu sawi zuiin Federer chuan, "Kar hmasa lama Basel hmuna kan inkhel nena khaikhin chuan ka game a ṭha leh tawh hle, kha tah khan champion mah ila a fuh lo lai a tam. Tunah chuan chak lo mah ila court chhunga ka chet danah lawmna tur tam tak a awm," tiin a sawi.

A thiam pariat inelna tura buatsaih ATP Finals-ah Federer hi a inlan leh dawn tih a chiang tawh a, amah ang thoa player ṭha fal zingah engtiang chiaha lian nge a la nih tih chu fiahin a awm dawn a ni.