Cormier hmaah Derrick Lewis a tlawm

UFC 230-a mipui nghahhlelh ber 'fight'-ah Daniel Cormier chuan Derrick Lewis a hneh a, WWE star Brock Lesnar nena inhmachhawn thei dinhmunah a ding mek.

Cormier hian round hnihna lekah rear-naked choke hmangin Lewis hi a tlawm a, light heavyweight leh heavyweight champion a nihna chu a humhim zel - heavyweight-a fight vawi 15 a hmachhawn tawhah a la tlawm miah lo.

Kum 39 mi fighter chuan Lewis fak zuiin, "A kut thlak apiang kha a na em em e, fighter ropui taka ni. A khel ṭha takzet a, ani nena octagon khata kan inhmachhawn thei hi ka lawm a ni," a ti.

March 20-a kum 40 a tlin huna fight chawlhsan a tum thu sawitu Cormier chuan, "Brock Lesnar, min hmachhawn tura ilo kal hunah chuan i WWE title kha i rawn keng tel tur a ni," tiin Lesnar a cho.

Lesnar hian kum 2008 khan professional fight a hmachhawn vawi linaah UFC heavyweight title a hlawh chhuak a, UFC legend Randy Couture chu UFC 91-ah a tlawm.

A kawnghren humhim tura fight a hmachhawn vawi thumnaah Cain Velasquez a ngam lo a, December 2011-ah Alistair Overeem ngam lo lehin MMA a chawlhsan.

Kum 2016 khan lo kir lehin Mark Hunt a hneh a, mahse damdawi hman phal loh a lo hmang tih hmuhchhuah a nih avangin hrem a ni.

WWE lamah a hming a chher chhunzawm a, kar hmasa khan WWE universal title hlawh chhuakin Cormier chuan he champion kawnghren pawh hi keng tel turin a ti a ni.

UFC 230 result
Weight class Hming Hming Chak dan Round Time
Heavyweight Daniel Cormier def. Derrick Lewis Submission (rear-naked choke) 2 02:14
Middleweight Ronaldo Souza def. Chris Weidman TKO (punches) 3 02:46
Middleweight Jared Cannonier def. David Branch TKO (punches) 2 00:39
Middleweight Karl Roberson def. Jack Marshman Decision (unanimous) (30-26, 30-26, 30-27) 3 05:00
Middleweight Israel Adesanya def. Derek Brunson TKO (knees and punches) 1 04:51