BVT-in Chawnpui an hneh, nghawng a nei lian

Mc Dowell's No. 1 Soda Mizoram Premier League Season 7 a ngaihnawm chho a, round 11-a match thum khelhah dinhmun sang zawk team an chak loh vek avangin season tawp boruak a nung ṭha hle.

Ningani zanah Ramhlun North-in Mizoram Police an hneh a, Zirtawpni tlaiah Chanmari FC-in Electric Veng an hneh a, zan lamah Bethlehem Vengthlang FC 2-0 in an hneh. BVT tan hian K. Lalnunpuia leh C. Vanlalhmangaiha ten goal an khung a, keeper R. Lalhmangaihzuala chu man of the match-a thlan a ni.

BVT an harh thar

Bethlehem Vengthlang FC-in Chawnpui an hmachhawn hmain Electric Veng 2-0 a hnehin tun season-a a vawi khat nan hnehna an chang a, hei vang hian Zirtawpni zanah pawh inrintawkna an nei phah.

Chawnpui erawh ṭum dang ang lo takin semifinal khelh an duh avangin attacking game khelh an tum a, amaherawhchu team ṭha zawk dinhmun aṭanga goal nawrtu zawk nih erawh an thiam tawk lo.

Minute 24-naah H. Lalhlimpuia freekick pet chu BVT-in an hmun himah an pet chhuak thei lo a, box pawnah Nunpuia chuan chang fuhin goal kilah tak a khung a, goal ropui a ni.

Chawnpuiin goal hnaiah chance an insiam thei lo a, hla tak aṭanga 'risk' an ngah thung a, BVT keeper Lahmaa'n a hna a tlin hle. Minute 42-naah BVT bawkin goal an khung a, Lalmuanzova ball pek chu Hmangaiha'n goal-ah chantirin first half-ah 2-0 a ni.

Second half-ah Chawnpuiin ball an chang tam a, awmze neiin BVT tlarhnung an ṭhiat thei lo thung. Lengpui tlangval Lalhmaa a che ṭha chhunzawm a, goal dang a luh belh tawh lo.

Lahmaa hian BVT hi October thla khan zawm chauhin match thum a inlanah point ruk a hlawhchhuah pui. BVT tlarhnungah defender ṭha Lalhlima leh Jonathan H. Lalhriatkima te an inkawp thei a, defensive midfielder rintlak Lalchhuanpuia'n tlarhnung a pui ṭhat bawk avangin he team hi eng tema tan pawh tum châkawm an ni tawh lo ang.

Result nghawng

Semifinal khel tur hriat a har leh ta sawt a, season liam ta pawh hian hetiang dinhmun ang deuh chiah hian MPL table hi a awm tawh.

Amaherawhchu tun season danglamna erawh Aizawl FC-in I League an khelh avangin MPL-ah an insawrbing thei lo a, Mizoram Police pawh kim ṭum leh ṭum loh an nei a, vawi hnih champion tawh Chanmari FC-in inrintawkna an nei hleithei lo a, semifinal khelh inbeisei dang pahnih Electric Veng leh Chawnpui pawh MPL club thar an nih avangin pressure sangah fiahin an la awm lo.

Mak ang reng takin table hnuai lama awm pahnih BVT leh Ramhlun North te match hnuhnung pahnihah hnehna an chak a, team nem tiha sawi theih an ni tawh lo. Ramhlun North phei chu season ṭantirha champion inbeisei kha an ni a, tum an châkawm loh.

MPL7-ah match khelh hmabak pathum a la awm a, team tin point a inhnaih avangin inkhel pakhat result-in team dinhmun a thlak hlawk hlawk thei dawn a, tun kara khelh tur round 12 a pawimawh ang.

Khelh Hmabak
Chhinga Veng
Nov 9 Chawnpui
Nov 13 Ramhlun North
Nov 17 Bethlehem VT
Nov 19 Aizawl FC
Aizawl FC
Nov 7 Neroca (I League)
Nov 8 Electric Veng
Nov 10 Minerva Punjab (I League)
Nov 13 Mizoram Police
Nov 17 Chanmari FC
Nov 19 Chhinga Veng FC
Electric Veng FC
Nov 8 Aizawl FC
Nov 14 Chawnpui
Nov 16 Mizoram Police
Mizoram Police
Nov 9 Bethlehem VT
Nov 13 Aizawl FC
Nov 16 Electric Veng
Chawnpui
Nov 9 Chhinga Veng
Nov 14 Electric Veng
Nov 16 Ramhlun North
Chanmari FC
Nov 8 Ramhlun North
Nov 14 Bethlehem VT
Nov 17 Aizawl FC
Ramhlun North
Nov 8 Chanmari FC
Nov 13 Chhinga Veng
Nov 16 Chawnpui
Bethlehem VT
Nov 9 Mizoram Police
Nov 14 Chanmari FC
Nov 17 Chhinga Veng