Vawiin aṭangin I League khelh chhunzawm a ni dawn

Nikum December thlaa khelh ṭan tawh I League chu Covid-19 vanga thla hnih chuang chawlh a nih hnuah vawiin hian khelh chhunzawm a ni dawn. Mizo club Aizawl FC chuan zanin dar 7:30 hian Kalyani Stadium-ah Mohammedan SC an hmachhawn ang.

Aizawl FC hi an match hmasa berah foreigner leh player ṭha ṭhenkhat tel loin Real Kashmir lakah 3-2 in an vanduai a, zaninah insiamṭhat an tum dawn. Mizo club hmabak erawh a awlsam dawn lo–an khingpui tur hi Mohammedan a nih bakah Covid-19 vangin Aizawl FC hi an buai mek.

Inkhel dangah Sreenidi Deccan leh Trau te vawiin tlai dar 2:00-ah an inkhel ang a, Neroca leh Gokulam Kerala te tlai dar 4:30-ah an inkhel bawk ang.

Covid-19 buaina
Aizawl FC hian February 21 khan Aizawl chhuahsanin Kolkata an thleng a, Covid-19 vangin an thlenna five star hotel Novotel-ah an inkhung.

Tunkar tir khan training an nei ṭan a, player zingah hri leng kai an awm avangin an la kim lo. Fitness coach positive vangin coach Yan Cheng Law pawh a inkhung hrang a, tunah erawh an negative tawh avangin an zalen tawh.

Player zinga positive Ṭhasiama pawh a negative tawh a, a roommate Joseph Vanlalhruaia nen training an nei leh thei tawh bawk. Amaherawhchu goalkeeper Anuj Kumar leh striker Aser Pierrick Dipanda Dicka te an positive avangin an roommate Ayush Dev Chhetri leh Samuel Lalmuanpuia te nen an la inkhung hrang mek.

Nimin tlai khan Anuj leh Dicka te hi PCR hmangin test an ni a, result kan hre hman lo. An positive a nih chuan ni 10 chhung an inkhung a ngai dawn a, an roommate Ayush leh Samuel te pawh ni sarih an inkhung chhunzawm a ngai ang.

Beisei a awm
Aizawl FC hi Covid-19 vangin buai mah se an match hmasa bera Real Kashmir an hneh loh ṭum nen erawh squad a inchhah hleih tawh hle. Mohammedan lakah striker ṭha Willis Deon Plaza bakah defender lian ṭha pahnih Bhaktiyor Qalandarov leh Robert Primus te an tel thei ang.

Real Kashmir lakah defender lian ṭha an neih loh avangin set piece-ah an talbuai thei hle. Tun ṭumah erawh corner kick chawi ṭum pawha penalty chawi ta ang maia hlauhthawnna awm ṭhin kha a reh thei tawh ang.

Aizawl FC hi an squad a chhah ṭha a, kil tinah player ṭha chhawr tur an awm. Keeper Anuj awm lo mah se Mizo tlangval Lalmuansanga a awm a, Dicka bakah Samuel-a te an khel thei lo a nih pawhin Plaza hoin F. Lalremsanga, Jakob Vanlalhlimpuia leh Lalliansanga te tan hun ṭha a ni thei ang.

Mohammedan hi...
Mohammedan hi Kolkata club an ni a, inelna hi Kolkata-ah vek khelh a nih dawn avangin 'home advantage' an nei dawn. I League khelh theih loh chhungin training ṭha zetin an nei a, amaherawhchu hri leng vangin ni sarih chhung an inkhung.

Kolkata club-ah media manager chiahin hri leng a kai a, khelmualah a pawina a awm dawn lo. Mohammedan hi Mizo player panga Lalramchullova, Brandon VL Remdika, Zothanmawia (T.Mawia), Malsawmzuala leh Lalramhmunmawia (Tea) te khelhna a ni.

Chatlang tlangval Sawmtea tih loh hi chu Aizawl FC-a hming chher vek tawh an ni a, Mizo club hrechiangtu an ni. Mizo defender ṭha Chullova chuan, "Kan hotute an ṭang a, champion ngei kan tum. Nomawi chawi thei tur pawhin kan ṭhain ka hria," tiin Vanglaini a hrilh.

Mohammedan hian an match hmasa berah Sudeva Delhi 2-1 in an hneh a, an foreigner-te an ṭha bawk. Captain Nikola Stojanovic-a'n midfield a luahlum ṭha a, freekick pet thiam bik Andjelo Rudovic an nei bawk.