Saitualin MFA Cup a thleng dawn

Tualchhung football inelna ngaihhlut Mizoram Football Association Cup 2022 chu Saitual District Football Association-in a thleng dawn a, March 29 aṭangin khelh ṭan a ni ang.

Nimin khan Saitual DC VL Hruaizela Khiangte hoin MFA leh Saitual DFA hruaituten inelna chung chang hi an rel fel a, hri leng dinhmun a ziaawm chuan inelna hi kaltlangpui a ni ang.

MFA Cup atan hian DC kaihhruaina hnuaiah Organising Committee din nghal a ni a, anni hian a ṭul angin hri lêng dinhmun thlir chungin MFA Cup thlen theih dan tur an ngaihtuah chho dawn.

MFA chuan Saitual DC chungah lawmthu a sawi a, hun harsa tak karah footballer-te hma khúa ngaia inkhelh kalpui dan tur a ngaihtuahpui chu lawmawm an ti takzet a, Saitual District mipuite pawh DFA an nih hnua a vawi khatna atana MFA Cup hlawhtling taka thleng turin duhsakna sang ber a hlan nghal a ni.

MFA Cup hi District FA 11-a football club thate inelna tur a ni a, champion lai chu Aizawl FC Junior an ni. Kum 2019 khan Lawngtlaiin MFA Cup hi a thleng a, Aizawl DFA aiawh Aizawl FC Junior hian final-ah Lunglei DFA aiawh Zotlang FC an hneh. Tun ṭum inelna hi kum 2020-a Covid hripui len hnua Mizoram pum huap football inelna neih leh hmasak ber tur a ni ang.