India Vs Pakistan ; En man aṭangin nuai 10.3 a lut

Boxing hmanga inbeihna India vs Pakistan chu February 26, Inrinni khan Golf Club, Dubai-ah neih a ni a, Zonet kaltlangin Mizoramah tihchhuah a ni. Boxing en man aṭanga Zonet lakluh chu Rs 10,30,300 a ni a, nimin khan Mizo boxer pathum Lalrinsanga Tlau, NT Lalbiakkima leh Laldingliana te hnenah an chan tur ṭheuh an hlan.

Inhnek chu
Grassroot Boxing chuan Dubai-ah professional fight an buatsaih a, Mizo boxer pathum an inlan. Ruahman dan chuan Mizo boxer pali inlan tur a ni a, amaherawhchu JohnKenty Vanlalhlimpuia chu a hnathawhna Indian Navy-in phalna an pek theih loh avangin a tel ve thei ta lo.

Mizo professional boxer Lalrinsanga Tlau chuan unanimous decision-in Muhammad Sikandar Abbasi a hneh. Siaha tlangval NT Lalbiakkima'n round hnihna lekah Fida Muhammad chu a knockout. Tuipui tlangval Laldingliana'n unanmous decision-in Muhammad Ammar Khan a hneh ve bawk.

India vs Pakistan a nih angin Mizo boxer-te hmachhawn hi Pakistani boxer vek an ni a; Sangtea, NT-a leh Dinga te hi professional fight an hmachhawn tawhah an la chak vek.

Fight Purse leh PPV
Tun ṭum boxing inelnaah hian boxer-te hian an inhnek hlawh bakah Pay Per View (PPV) aṭangin sum an lalut. An inhnek hma hian contract an ziak sa vek.

Sangtea hian dollar 3,100 (Rs 2,31,802.50) a hlawh a, PPV aṭangin 8% a chang. NT-a hian dollar 3,000 (Rs 2,24,325) a hlawh a, PPV aṭangin 7% changin Dinga hian dollar 1000 (Rs 74,775) a hlawh a, PPV aṭangin 2% a chang ve bawk.

Boxing en man aṭangin Zonet-in Rs 10,30,300 an dawng. Zonet pawttuten Rs 100 chawiin an en a, TV aṭanga sum lakluh hi Rs 7,45,200 a ni. Chumi awmzia chu TV 7,452 kaltlangin boxing hi an en.

Zonet-in tun hnai khan online hmanga Zonet en theihna Zonet Empai App a ti chhuak a, heta ṭanga sum lut zat hi Rs 85,100 niin mi 851-in online kaltlangin an en. Sponsor pahnih Yamaha leh FK Roofing kaltlangin Zonet-in Rs 2,00,000 an dawng bawk a, an sum hmuh zawng zawng chu Rs 10,30,300 a ni ta chiah.

PPV aṭanga an chan tur an ziah lawk angin Sangtea'n Rs 82,424 (8%) a dawng a, NT-a leh Dinga ten Rs 72,121 (7%) leh Rs 20,606 (2%) an dawng ve bawk. JohnKenty a inlan theih loh avangin inelna buatsaihtu Grassroot Boxing-in a tira an chan tur 66% bakah Tuipui boxer dawn tur 7% an dawng tel a, 73% an chang. Grassroot Boxing hian Rs 7,52,119 an chang a, Zonet-in Rs 1,03,030 (10%) an chang ve bawk.

Boxing ngaina Bungkawn
Aizawl District bikah hian Zonet Distributor 66 an awm a, India vs Pakistan en tamna ber chu Bungkawn an ni. Bungkawn aṭangin chhungkaw 193-in boxing hi an thlir.

Boxing en tamna veng dang chu Venghnuai (185), Tuikual (157), Ramhlun Venglai (145), Chanmari (135), ITI Veng (121), Chhinga Veng & Saron (114), Ramhlun South (109), Ramthar (105), Bawngkawn, College Veng, Venghlui, Durtlang (104) leh Electric Veng (102) te an ni.