Man City tan Grealish a inlar

Manchester City player man to ber Jack Grealish chuan goal a khung ve leh ta. Riyad Mahrez leh Grealish te goal hmangin Man City hian Peterborough United 2-0 in an luhchhuah a, harsa lutuk loin quarterfinal an lut.

Thawhlehni zan Weston Homes Stadium-a inkhelah Pep Guardiola-a'n a player ṭha ṭhenkhat a hawhchawlhtir. Championship club lakah goal khung tur erawhin an nghah rei a ngai, goal pahnih hi second half-a lut ve ve a ni.

Pound maktaduai 100 man Grealish hian Etihad Stadium a pan hnuah a khel ṭha nghal pur pur bik lo. Inkhelh hmain Guardiola chuan a player hi a chhan a ngai hial a, an lei chhan chu goal tam tak khung tura beisei vang a ni lo tih a sawi hial.

England midfielder hian Phil Foden hnen aṭanga a ball hmuh chu tihsual nei loin goal-ah a chantir–FA Cup bika a goal hmasa ber a ni. Grealish hian match an khelh hma hian Lionel Messi inkhel lai video an en thu a sawi.

Grealish chuan, "Thil mak leh nuih zatthlak angreng tak a ni. Inkhel tura kan kalkawngah Phil nen kan ṭhu dun a, Messi-a inkhel lai video kan en. Goal kan khung chiah khan ka bulah Foden a rawn kal a, 'video kan en ang kha a ni', tiin a sawi," a ti.

England international Foden-a'n goal khung ve lo mah se Mahrez khung tur pawh a siamsak tho a ni. Season kal laiah Guardiola naute hian inelna hrang hrangah goal 103 an khung tling tawh, striker pangngai nei lo tia sawisel ngawt a remchang lo ang.

Spanish manager Guardiola-a'n a lo sawi lawk tawh ang ngeiin Oleksandr Zinchenko chuan inkhel bul a ṭan a, an ram Ukraine an thlawp a ni tih lantir nan Man City hian captain armband an hrentir a, a khel chhe lo hle bawk.

Man City hian Premier League-ah hma an hruai mek; Champions League-ah quarterfinal lut chiang tawha sawi ngam an ni, tunah FA Cup quarterfinal an lut leh bawk–season kal laiah nomawi pathum chawi thei dinhmunah an ding mek.

Pep chuan, "Engmah sawi lawk theih ka nei lo," tiin a naute lakah pressure a pe duh lo, vawi khat chetsual zeuhah an dinhmun ṭha tak hi a la inthlak kual thei reng a ni tih a hrechiang a, a la ṭawng fimkhur hle.

Citizens match lehpek chu Manchester Derby a ni dawn. March 6, Pathianni zan hian Etihad Stadium-ah Cristiano Ronaldo telna Manchester United hi an lo mikhual ang.