FA Cup: Boro-in Spurs an pet chhuak!
Ropui taka Manchester City an hneh hnu lawkah Burnley-in 1-0 in Tottenham Hotspur an barakhaih a, mahse, Antonio Conte naute hian 4-0 a Leeds United hneh zuiin Burnley laka an tlawm chu an tihpalh a ni tih an tarlang.
Mahse, Spurs chak a kaltluang thei lo–FA Cup fifth round aṭangin Championship club Middlesbrough chuan 1-0 in an pet chhuak a, hun pangngaiah 0-0 in inhnehtawk mah se, extra time-ah Boro-in goal an khung a, rawlthar Josh Coburn chuan minute 107-naah inkhela goal awmchhun hi a khung.
Spurs tan kum 2022 hi kum ṭha a ni lo–match 13 an khelh tawhah vawi sarih an tlawm tawh a, kum 14 chhung nomawi an chawi dawn lo tihna a ni nghal bawk.
Tottenham boss Conte chuan, "Ka sawi hmasak ber duh chu Middlesbrough-in an khel ṭha hle, tih hi a ni a, zah an phu a, hnehna an chan avangin lawmpui an phu a ni. Kan khelh dan kha kan inenlet leh a ṭul a ni," a ti.
Beisei phak lo
Conte-a'n Elland Road-ah ropui taka hnehna changin hlado a chham a, 4-0 ngawta Leeds an sawp avangin Premier League club hian coach Marcelo Bielsa chu a hna aṭangin an chawlhtir hial.
Italian manager-in Elland Road-a a naute khelh dan a hre reng a, Boro lakah a squad siksawi loin starting XI ngai a ring nawn a, team pahnih player theihna enin an 'quality' a inthlau hret.
Mahse, Spurs-in division hniam zawk team lakah beisei an phak lo a, London club tana first half chance ṭha ber chu Matt Doherty chuan goalkeeper Joe Lumley a bum hnuah a pet goal thei lo–an ui khawp ang.
Spurs khelh ṭhat loh zanah Son Heung-Min leh Harry Kane meuh pawhin danglamna an thlen thei lo a, English striker Kane hian goal-a khungah inngai mah se offside vangin pawmsak a ni lo.
Milian ngamtu
Middlesbrough-in FA Cup fourth round-ah Manchester United chu 1-1 a an inhnehtawkpui hnuin, penalty hmangin an lo pet chhuak tawh a, fifth round-ah team lian bawk hmachhawn mah se an pet chhuak leh ta.
Boro khelmual Riverside Stadium-ah mi 34,742 an ṭhu thei a, Spurs an mikhual zanah hian kum nga chhunga a vawi khat nan ticket an hralh zo vek–fan-ten an duh ang result an hmu a, lawm takin an haw.
Minute 107-naah Matt Crooks-a ball pek chu um lutin Coburn chuan goal-ah a chantir a, Riverside khelmual chu a nghinin a nghing a ni ber. Spurs-in a chhanletna tur an nei lo a, kum 2017 hnua a vawi khat nan FA Cup quarterfinal an lut.
Goal khungtu Coburn chuan, "Sawi tur pawh ka hre lo zawk. Riverside Stadium-ah ngei, Premier League club laka khatiang goal khung kha chu a nuam a, a ropui takzet. Thua sawifiah chi a ni lo," tiin a hlim thu a sawi.
Ze ngai?
England legend Alan Shearer chuan, "Vanneih vanga thil thleng a ni lo a, a tir aṭanga a tawp thleng khan Boro kha an ṭha zawk a ni. Chris Wilder pawh a team lakah lawm rawh se, mipui leh player te chak turin an inpeih a, Spurs an zuih leh ta–hei chu an nih phung ve reng a ni," a ti a, London club ṭantu tan lem a harsa ang.
Boro tan goal an khung hmain Marcus Tavernier chuan chance duhawm a nei bawk a, mahse, Hugo Lloris chuan a dansak. Spurs-in beisei phak lo mah se chance nei lo tawpa sawi erawh a rem lo.
Championship club keeper Joe Lumley chuan Son-a khung tur nia lang chu a dansak a, South Korean striker-in hun tawp lama Lumley tana dan nuam tak tura a chance neih a khawhralte pawh zan danga a khung ṭhin a ni.
Conte chuan, "Zanin ang inkhelah hi chuan ṭha taka bul ṭan a, khingpui an insan mar hmaa tukdawl hi a ṭha ber chu a ni ṭhin. Beiseina i siamsak a nih chuan hma an sawn zel ang a, eng pawh thleng thei a ni," a ti.
A rei ta
Kum 2008-a League Cup-a an champion hnuah Spurs-in nomawi chawi an nei leh tawh lo a, tun season pawh kut ruak bawkin an thlah leh dawn tihna a ni–Spurs fan-te beiseina Conte meuh pawhin eng a thlen thei lo.
Chelsea boss hlui chuan, "Cup inelnaa khualmuala kan khel a nih chuan game thunun hma a ngai. Kan khingpui ten a awlsam lo tih an hre tur a ni a, kha aia ṭha zawka khel thei tur kan ni. A tawpah chuan Boro-in chak an phu a ni," a ti.
March 2021-ah Sheffield United-in an club siam liantu Chris Wilder an ban a, English coach hian November khan Boro hi a pan zui–tunah chuan FA Cup quarterfinal a hruai thleng ta.
Wilder chuan, "Kan fan-ten khati taka khel ṭha tur khan min pui a ni," a ti a, Boro captain Jonny Howson chuan, "Ka fapa Harry chuan Cristiano Ronaldo telna kan hneh kha a ring lo hrim hrim a, mahse, tunah chuan Ronaldo bakah Harry Kane telna team pawh kan hneh thu ka sawi thei ta," tiin a sawi.
March 1, Thawhlehni Zan
Peterborough United 0–2 Manchester City
MAN: Riyad Mahrez 60'; Jack Grealish 67'
Crystal Palace 2–1 Stoke City
CRY: Cheikhou Kouyaté 53'; Jaïro Riedewald 82'
STO: Josh Tymon 58'
Middlesbrough 1–0 Tottenham Hotspur
MID: Josh Coburn 107'
Nizan Inkhel (Result kan hre hman lo)
Luton Town 12:45 AM Chelsea
Southampton 01:00 AM West Ham United
Liverpool 01:45 AM Norwich City
Zanin Inkhel Tur
Everton 1:45 AM Boreham Wood
March 7, Thawhṭanni Zan
Nottingham Forest 1:00 AM Huddersfield